اسلام آباد: وزیر اعظم عمران خان کا کہنا ہے کہ ٹیکنالوجی انڈسٹری سے زر مبادلہ کمایا جاسکتا ہے، حکام آئی ٹی کے شعبے میں سرمایہ کاروں کی سہولت کے لیے اقدامات کریں۔
تفصیلات کے مطابق وزیر اعظم عمران خان کی زیر صدارت اسپیشل ٹیکنالوجی زون اتھارٹی کے بورڈ آف گورنرز کا اجلاس ہوا۔
وفاقی وزیر برائے انفارمیشن ٹیکنالوجی امین الحق، چیئرمین اسپیشل ٹیکنالوجی زون اتھارٹی عامر ہاشمی، مشیر خزانہ شوکت ترین، ڈاکٹر ثانیہ نشتر اور دیگر سرکاری حکام اجلاس میں شریک ہوئے۔
اجلاس کے دوران بریفنگ میں بتایا گیا کہ غیر ملکی سرمایہ کاروں نے 520 ملین ڈالرز کی سرمایہ کاری کا وعدہ کیا ہے، سرمایہ کاری اسلام آباد، کراچی اور لاہور کے ٹیکنالوجی زون میں ہوگی۔
اجلاس میں وزیر اعظم عمران خان کا کہنا تھا کہ ٹیکنالوجی کی حقیقی صلاحیت سے فائدہ اٹھانے پر توجہ مرکوز کر رہے ہیں، ٹیکنالوجی سے زر مبادلہ کمایا جاسکتا ہے اور اس سے کرنٹ اکاؤنٹ خسارہ کم ہوسکے گا۔
انہوں نے کہا کہ حکام آئی ٹی شعبے میں سرمایہ کاروں کی سہولت کے لیے اقدامات کریں، غیر ملکی سرمایہ کاری کو راغب کرنے کے لیے کام تیز کیا جائے۔
