اسلام آباد: وزیر اعظم عمران خان نے کاروبار اور سرمایہ کاری سے متعلق بڑا فیصلہ کرتے ہوئے کاروباری سہولیات کے جائزے سے متعلق اجلاس ہر ماہ بلانے کا فیصلہ کرلیا۔
تفصیلات کے مطابق وزیر اعظم عمران خان کی زیر صدارت اجلاس منعقد ہوا۔ اجلاس میں وزیر خزانہ اسد عمر، وزیر قانون فروغ نسیم ،مشیر تجارت عبدالرزاق داؤد نے شرکت کی جبکہ چیئرمین سرمایہ کاری بورڈ ہارون شریف سمیت اقتصادی ماہرین بھی شریک ہوئے۔
اجلاس میں سرمایہ کاروں کو سازگار ماحول فراہم کرنے سے متعلق معاملات پر تبادلہ خیال کیا گیا۔
دوران اجلاس وزیر اعظم عمران خان کو سرمایہ کاروں کے لیے کیے گئے حالیہ اقدامات پر بریفنگ دی گئی۔ بریفنگ میں بتایا گیا کہ سرمایہ کاری کے لیے ماحول سازگار بنانے کے اقدامات جاری ہیں۔
وزیر اعظم کو کاروباری افراد کو درپیش ٹیکسز اور پالیسی ایشوز پر بھی بریفنگ دی گئی۔ انہیں بتایا گیا کہ صوبائی سطح پر اقتصادی زون کے قیام میں رکاوٹوں کو دور کیا جا رہا ہے۔ نجی شعبے کا حکومتی پالیسیز پر اعتماد بحال کرنے کی کوششیں کر رہے ہیں۔
وزیر اعظم نے کہا کہ سرمایہ کاروں کو درپیش مسائل پر فوری اقدامات کیے جائیں، انہوں نے ہدایت کی کہ اقتصادی ٹیم جامع پلان پیش کرے۔
وزیر اعظم نے کاروباری سہولیات کے جائزے سے متعلق اجلاس ہر ماہ بلانے کا فیصلہ بھی کیا۔
