اسلام آباد: وزیر اعظم عمران خان کی زیر صدارت اہم اجلاس میں عوام کو مہنگائی سے ریلیف فراہم کرنے کے حوالے سے اقدامات پر غور کیا گیا، وزیر اعظم کی جانب سے لیے گئے اہم فیصلوں کا اعلان کل کیا جائے گا۔
تفصیلات کے مطابق وزیر اعظم عمران خان کی زیر صدارت مہنگائی میں کمی سے متعلق ایک اور اہم اجلاس منعقد ہوا۔
اجلاس میں معاون خصوصی برائے سماجی تحفظ ڈاکٹر ثانیہ نشتر، چیئرمین یوٹیلیٹی اسٹورز ذوالفقار علی خان، وزارت خزانہ، صنعت و پیداوار اور سماجی تحفظ ڈویژن کے وفاقی سیکریٹری، ایم ڈی یوٹیلیٹی اسٹور اور دیگر سینئر افسران شریک ہوئے۔
اجلاس میں عوام کو مہنگائی سے ریلیف فراہم کرنے اور اشیائے ضروریہ سستے نرخوں پر فراہمی کے حوالے سے اقدامات پر غور کیا گیا۔ اس موقع پر وزیر اعظم عمران خان کا کہنا تھا کہ اولین ترجیح غریب اور تنخواہ دار طبقے کو ریلیف فراہم کرنا ہے۔
انہوں نے کہا کہ عوامی ریلیف کے لیے حکومت ہر حد تک جائے گی، غریب عوام کی تکالیف پر حکومت خاموش تماشائی نہیں بن سکتی۔
خیال رہے کہ گزشتہ روز وزیر اعظم نے اہم اعلان کرتے ہوئے کہا تھا کہ مجھے ان مشکلات کا ادراک ہے جن کا تنخواہ دار طبقے سمیت مجموعی طور پر عوام کو سامنا ہے۔
انہوں نے کہا تھا کہ میں نے فیصلہ کیا ہے کہ کچھ بھی ہوجائے، میری حکومت منگل کو کابینہ کے اجلاس میں عوام کے لیے بنیادی غذائی اجناس کی قیمتوں میں کمی کی خاطر مختلف اقدامات کا اعلان کرے گی۔
