اسلام آباد : وزیراعظم عمران خان نے حماد اظہر کا قلمدان تبدیل کرتے ہوئے وفاقی وزیربرائےاقتصادی امور ڈویژن مقرر کردیا جبکہ مشیر خزانہ حفیظ شیخ کوریونیو ڈویژن کا قلمدان واپس دے دیا گیا۔
تفصیلات کے مطابق وزیراعظم عمران خان نے حماد اظہر سے ریونیو ڈویژن کا قلمدان واپس لے کر مشیر خزانہ حفیظ شیخ کو دوبارہ ریونیو ڈویژن کا قلمدان دے دیا۔
وزیراعظم نے حماد اظہر کو وفاقی وزیر برائے اقتصادی امور ڈویژن مقرر کردیا ، جس کا کابینہ ڈویژن نے نوٹیفکیشن جاری کردیا ہے۔
ذرائع کے مطابق حفیظ شیخ نے ریونیو ڈویژن کا قلمدان واپس لیے جانے پر تحفظات کا اظہار کیا تھا۔
گذشتہ روز وزیراعظم عمران خان نےمشیرخزانہ حفیظ شیخ کےاختیارات کم کرتے ہوئے ریونیو ڈویژن کاقلمدان واپس لے کر حماد اظہر کو وفاقی وزیر ریونیو ڈویژن مقرر کردیا تھا۔
مزید پڑھیں : وزیراعظم عمران خان نے مشیرخزانہ حفیظ شیخ کےاختیارات کم کردیئے
یاد رہے ایوان صدر میں حلف برداری کی تقریب میں صدر مملکت نے حماد اظہر سے وفاقی وزیر کے عہدے کا حلف لیا تھا۔
واضح رہے کہ وزیر اعظم عمران خان نے حماد اظہر کو وفاقی وزیر بنانے کی منظوری دیتے ہوئے سمری ایوان صدر کو ارسال کی تھی جہاں صدر مملکت نے منظور کی۔
اس سے قبل وہ وزیر مملکت برائے ریونیو کی حیثیت سے کام کر رہے تھے۔
