اسلام آباد: الیکشن کمیشن نے وزیراعظم کو لوئر دیر میں جلسہ کرنے سے روک دیا۔
الیکشن کمیشن کی جانب سے جاری بیان میں کہا گیا ہے کہ پبلک آفس ہولڈرز پر الیکشن مہم میں حصہ لینے پر پابندی ہے، اس حوالے سے ڈسٹرکٹ مانیٹرنگ آفیسر لوئر دیر نے وزیراعظم کو مراسلہ جاری کردیا ہے جس میں وزیراعظم کو جلسہ کرنے سے منع کیا گیا ہے۔
مراسلے کے مطابق وزیر اعظم 11 مارچ کو لوئر دیر میں جلسہ کرنے جارہے ہیں جبکہ الیکشن کمیشن لوئر دیر میں بلدیاتی الیکشن کا شیڈول جاری کرچکا ہے۔
مراسلے میں بتایا گیا ہے کہ بلدیاتی انتخابات کے باعث جلسے میں شرکت کوڈ آف کنڈکٹ کی خلاف ورزی ہوگی۔
ادھر اٹارنی جنرل خالد جاوید خان کی اے آر وائی نیوز سے خصوصی گفتگو کرتے ہوئے کہا کہ الیکشن کمیشن قانون کے تابع ہے جبکہ الیکشن کمیشن کا ضابطہ اخلاق آرڈیننس سے متصادم ہے۔
اٹارنی جنرل نے کہا کہ آرڈیننس قانون ہوتا ہے اور الیکشن کمیشن بھی خلاف ورزی نہیں کرسکتا، الیکشن کمیشن کو قانون پر اعتراض ہےتوعدالت سےرجوع کرے۔
گذشتہ روز تحریک انصاف کے رہنما فیصل جا وید خان نے سماجی رابطے کی ویب سائٹ ٹوئٹر پر جاری بیان میں بتایا تھا کہ منڈی بہاؤالدین اور میلسی کے کامیاب عوامی جلسوں کے بعد اب وزیراعظم عمران خان عوامی رابطہ مہم کے تحت جمعہ لوئر دیر خیبرپختونخوا میں جلسہ عام سے خطاب کریں گے۔
