اسلام آباد : وزیراعظم عمران خان نے فیصل واوڈا کو ایم کیو ایم سے بات چیت کا ٹاسک دے دیا ، فیصل واوڈا آج حکومتی ٹیم کے ہمراہ ایم کیو ایم وفد سے ملاقات کریں گے۔
تفصیلات کے مطابق وزیراعظم عمران خان نے فیصل واوڈا سے فون پر رابطہ کرکے ایم کیو ایم سے بات چیت کا ٹاسک دے دیا، جس کے بعد وزیراعظم کی ہدایت پر فیصل واوڈا اسلام آباد پہنچ گئے ہیں۔
فیصل واوڈا آج حکومتی ٹیم کے ہمراہ ایم کیو ایم وفد سے ملاقات کریں گے ، فیصل واوڈا کا کہنا ہے کہ وزیراعظم کی ہدایت پر کراچی سے واپس اسلام آباد پہنچاہوں ، وزیراعظم کا اعتماد اورہر قسم کے فیصلے کا بھرپور مینڈیٹ حاصل ہے۔
پی ٹی آئی رہنما نے کہا کہ پرویزخٹک اور عمران اسماعیل سمیت حکومتی ٹیم کا حصہ ہوں گے۔
گذشتہ رات حکومتی ٹیم نے ایم کیوایم پاکستان کے رہنماؤں سے پارلیمنٹ لاجز میں ملاقات کی تھی ، پرویز خٹک، عمران اسماعیل پر مشتمل دو رکنی حکومتی وفد نے مذاکرات کیے۔
اس حوالے سے گورنر سندھ عمران اسماعیل نے کہا تھا کہ وزیراعظم عمران خان کا اہم پیغام خالد مقبول صدیقی کو پہنچادیا ہے، انشاءاللہ صبح تک فیصلہ ہوجائے گا۔
گورنر سندھ کا کہنا تھا کہ عمران اسماعیل نے کہا کہ ایم کیوایم کے ساتھ ہر قسم کے معاہدے کیلئے موجود ہیں، ہم نے ان کو ایک وزارت آفر کی تھی، اس سے آگے کچھ چاہیں گے تو دے دیں گے، ہمارے دروازے ایم کیو ایم کے لیے کھلے ہیں، جس طرح چاہیں گے ایڈجسٹ کر لیں گے۔
خیال رہے پاکستان پیپلز پارٹی کے چیئر مین بلاول بھٹو زرداری نے دعویٰ کیا ہے کہ متحدہ اپوزیشن، ایم کیوایم پاکستان میں معاہدہ طے پا گیا ہے۔
