The news is by your side.

Advertisement

حکومتی اقدامات کی مؤثر تشہیر، وزیر اعظم نے کمیٹی تشکیل دے دی

اسلام آباد: وزیر اعظم عمران خان نے حکومتی اقدامات کی مؤثر تشہیر کے لیے اسٹریٹجی کمیٹی تشکیل دے دی ہے۔

تفصیلات کے مطابق حکومتی اقدامات کی مؤثر تشہیر کے لیے وزیر اعظم نے کمیٹی تشکیل دے دی ہے جس میں اسد عمر، بابر اعوان، شفقت محمود، مراد سعید اور معید یوسف کو شامل کیا گیا ہے۔

اے آر وائی نیوز کے مطابق اسٹریٹجی کمیٹی کا پہلا اجلاس آج شام کو ہوگا، اجلاس میں حکومتی فلاحی اقدامات اور منصوبوں کی فہرست تیار کی جائے گی، اور حکومت کے 5 سر فہرست اقدامات کی مؤثر آگاہی کے لیے حکمت عملی طے ہوگی۔

یہ کمیٹی سال 2020 میں میڈیا اسٹریٹجی کے لیے سفارشات بھی طے کرے گی، جنھیں وزیر اعظم کی زیر صدارت آیندہ اجلاس میں پیش کیا جائے گا۔

خیال رہے کہ آج وزیر اعظم عمران خان کی زیر صدارت وفاقی کابینہ کا اجلاس بھی ہے جس میں 9 نکاتی ایجنڈے پر غور کیا جائے گا، کابینہ اجلاس میں ملکی معاشی اور سیاسی صورت حال پر غور ہوگا، نیشنل کالج آف آرٹس انسٹیٹیوٹ کے بل کا مسودہ پیش ہوگا، آئل اینڈ گیس ڈیولپمنٹ کمپنی کے سی ای او کی تعیناتی کا معاملہ دیکھا جائے گا، اسٹیٹ بینک مالی اسٹیٹمنٹ برائے مالی سال 2018 کے اجرا کی منظوری بھی ایجنڈے میں شامل ہے۔

اجلاس میں ناروے کے شہری کی پاکستان سے ناروے کو حوالگی کا معاملہ زیر غور آئے گا، وزارت داخلہ کی سہیل احمد کی برطانیہ کے حوالے کرنے کی درخواست پر غور ہوگا، سمال اینڈ میڈیم انٹرپرائزز کے سی ای او کی منظوری بھی دی جائے گی، وفاقی کابینہ کو اہم معاشی اعداد و شمار پر بھی بریفنگ دی جائے گی۔

Comments

یہ بھی پڑھیں