بیجنگ: وزیر اعظم عمران خان سے ایتھوپین ہم منصب ابی احمد کی ملاقات ہوئی۔ ملاقات میں خطے کی صورتحال اور عالمی معاملات پر تبادلہ خیال کیا گیا۔
تفصیلات کے مطابق بیجنگ میں بیلٹ اینڈ روڈ فورم کی سائیڈ لائن پر وزیر اعظم عمران خان سے ایتھوپین ہم منصب ابی احمد کی ملاقات ہوئی۔ ملاقات میں خطے کی صورتحال اور عالمی معاملات پر تبادلہ خیال کیا گیا۔
ملاقات کے جاری کردہ اعلامیے کے مطابق ملاقات میں باہمی دلچسپی کے امور بھی زیر غور آئے۔ وزیر اعظم عمران خان نے افریقی ممالک کے ساتھ تعلقات کی اہمیت پر زور دیا۔
وزیر اعظم عمران خان نے آپس میں سیاسی اور تجارتی سرگرمیاں بڑھانے کی تجویز دی جبکہ دونوں ممالک کا متواتر اعلیٰ سطح کے وفود کے تبادلوں پر بھی اتفاق ہوا۔
اس موقع پر وزیر اعظم عمران خان کا کہنا تھا کہ پاکستان افریقی ممالک کے ساتھ تعلقات کو وسعت دے رہا ہے، کمرشل سرگرمیوں کے فروغ کے لیے عوامی رابطوں کا تبادلہ ضروری ہے۔
انہوں نے مزید کہا کہ پاکستان افریقہ میں امن و استحکام کے لیے کردار جاری رکھے گا۔
اس سے قبل وزیر اعظم نے بیلٹ اینڈ روڈ فورم میں گول میز کانفرنس سے خطاب کرتے ہوئے کہا تھا کہ چین جدید دور میں کامیابی کی عظیم مثال ہے، چین نے ترقی کو فروغ دے کر معاشرے کو تبدیل کردیا۔ یہ تبدیلی چینی قیادت کی بہترین حکمت عملی کی وجہ سے ہے۔
انہوں نے کہا کہ تھا کہ چینی صدر نے بیلٹ اینڈ روڈ فورم کا نظریہ پیش کیا ہے، منصوبہ معاشی استحکام اور عوامی رابطے کی رکاوٹیں توڑ سکے گا، معیشت کی مضبوطی اور عوامی خوشحالی کے لیے منصوبہ شاندار ہے۔
وزیر اعظم نے مزید کہا تھا کہ چین کا ابتدائی شراکت دار بننا پاکستان کے لیے قابل فخر ہے، دونوں ممالک میں خصوصی اقتصادی زون قائم کیے جا رہے ہیں۔ موٹر وے، ہائی ویز اور ریلوے کا نظام بہتر کیا جا رہا ہے۔
