ماسکو : وزیر اعظم عمران خان کی روسی صدرپیوٹن سے اہم ملاقات آج ہوگی، جس میں پاکستان فیٹف میں روس سے مدد کے لیے بات کرے گا۔
تفصیلات کے مطابق وزیراعظم عمران خان اور روسی صدر ولادی میر پیوٹن کے درمیان اہم ملاقات آج ہوگی، جس میں عالمی فورمز پر ایک دوسرے کی حمایت کیلئے گفتگو ہوگی جبکہ پاکستان فیٹف میں روس سے مدد کے لیے بات کرے گا۔
ملاقات میں افغان صورتحال اور نیوکلیئر سپلائرز گروپ میں پاکستان کی رکنیت ، اوراقوام متحدہ سمیت فیٹف میں دوطرفہ تعاون پر بھی گفتگو کی جائے گی۔
ذرائع کے مطابق خطے میں امن کیلئے پاکستان کی دفاعی ضروریات پر بھی بات ہوگی جبکہ دفاعی ساز و سامان اور بھارت کو دیے گئے روسی میزائل ایس فور ہنڈریڈ پر بھی گفتگو کا امکان ہے۔
دونوں رہنماؤں کے درمیان ملاقات میں پاکستان اسٹریم گیس پائپ لائن منصوبے میں شیئر ہولڈرز معاہدے کو حتمی شکل دی جائے گی۔
وزیراعظم ماسکو میں روس کی سب سے بڑی مسجداور اسلامک سینٹرکادورہ بھی کریں گے۔
یادرہے گزشتہ روز وزیراعظم عمران خان کے ماسکو پہنچنے پر پرتپاک استقبال کیا گیا اور ہوائی اڈے پر گارڈ آف آنر پیش کیا، وزیر اعظم عمران خان کا روسی نائب وزیر خارجہ نےخوش آمدید کہا۔
وزیراعظم ریڈ کارپٹ پر چل کرآئے تو روسی فوجی دستے نے سلامی دی اور اس موقع پر پاکستان اور روس کےقومی ترانےکی دھنیں بجائی گئیں۔
