The news is by your side.

Advertisement

وزیر اعظم عمران خان سے مشیر خزانہ کی ملاقات

اسلام آباد: وزیر اعظم عمران خان سے مشیر خزانہ ڈاکٹر عبدالحفیظ شیخ کی ملاقات ہوئی۔ ملاقات سے قبل حفیظ شیخ کا کہنا تھا کہ آئی ایم ایف کے ساتھ مذاکرات کا عمل تیز کیا جائے گا۔

تفصیلات کے مطابق وزیر اعظم عمران خان سے مشیر خزانہ ڈاکٹر عبدالحفیظ شیخ کی ملاقات ہوئی۔ ملاقات میں مشیر خزانہ نے آئی ایم ایف سے گفتگو پر وزیر اعظم کو بریفنگ دی۔

وزیر اعظم سے ملاقات سے قبل میڈیا سے گفتگو کرتے ہوئے حفیظ شیخ کا کہنا تھا کہ نئے بجٹ کی تیاری کی ہدایت جاری کر دی ہے، آئی ایم ایف کے ساتھ مذاکرات کا عمل بھی تیز کیا جائے گا۔

حفیظ شیخ کا کہنا تھا کہ بجٹ کے لیے میڈیم ٹرم اسٹریٹجی پیپر کے لیے بنیادی ہدایات دے دیں، آمدنی اور اخراجات کے اہداف کو حتمی شکل دے دی ہے۔ پاکستان آئی ایم ایف سے مذاکرات کا عمل آگے بڑھانا چاہتا ہے،۔

انہوں نے کہا کہ آئی ایم ایف نے مشن جلد پاکستان بھیجنے کی یقین دہانی کروائی ہے، پاکستان کے لیے آئی ایم ایف کے مشن ہیڈ سے آج شام بات ہوگی۔ آئی ایم ایف کا مشن جلد از جلد پاکستان آئے گا۔

خیال رہے کہ مشیر خزانہ ڈاکٹر عبدالحفیظ شیخ نے آج ہی اپنے عہدے کا چارج سنبھالا ہے، چارج سنبھالنے کے بعد سیکریٹری خزانہ یونس ڈھاگہ سے ان کی ملاقات کے دوران ملک کو درپیش معاشی چیلنجز کے حل کے لیے روڈ میپ زیر غور آیا۔

حفیظ شیخ کو دو روز قبل وزیر خزانہ اسد عمر کے مستعفی ہونے کے بعد مشیر خزانہ مقرر کیا گیا تھا۔

18 اپریل کو اسد عمر نے سماجی رابطے کی ویب سائٹ ٹویٹر پر اپنے ٹویٹ میں اعلان کیا تھا کہ وہ اب کابینہ میں کوئی وزارت اپنے پاس نہیں رکھیں گے۔

ٹویٹر پیغام میں انہوں نے اے آر وائی نیوز کی خبر کی تصدیق کرتے ہوئے کہا تھا کہ کابینہ میں رد و بدل کے عمل میں وزیر اعظم عمران خان چاہتے تھے کہ میں خزانہ کے بجائے توانائی کی وزارت سنبھالوں، تاہم میں نے ان سے درخواست کی ہے کہ مجھے کابینہ میں کوئی عہدہ نہ دیا جائے۔

Comments

comments

یہ بھی پڑھیں