اسلام آباد: وزیر اعظم عمران خان نے معاشی ٹیم کو غریب افراد پر بالواسطہ ٹیکسوں کا بوجھ کم کرنے کے لیے اقدامات کی ہدایت کر دی۔
تفصیلات کے مطابق آج وزیر اعظم عمران خان کی زیر صدارت حکومت کی معاشی ٹیم کا اجلاس منعقد ہوا، جس میں بنیادی اشیائے ضروریہ کی قیمتوں میں کمی لانے کے اقدامات پر تبادلہ خیال کیا گیا اور قیمتوں میں ممکنہ حد تک کمی لانے کے لیے اقدامات پر غور کیا گیا۔
وزیر خزانہ نے اجلاس میں بتایا کہ گندم کی پیداوار اور ضروریات کو پورا کرنے کے لیے پلان موجود ہے، سرکاری سطح پر گندم کی خرید، ترسیل، اسٹوریج اور دیگر انتظامات کر لیے ہیں، اب اخراجات میں واضح کمی لانے سے متعلق مفصل پلان تشکیل دیا جا رہا ہے۔
اجلاس میں وزیر اعظم کو درآمد شدہ گھی، دالوں اور دیگر اجناس پر ڈیوٹیز کی شرح پر بریفنگ دی گئی، معاون خصوصی ڈاکٹر وقار مسعود نے ڈیوٹیز میں چھوٹ پر بریفنگ دی، اور درآمد شدہ گھی وغیرہ پر ٹیکسوں سے متعلق دیگر ممالک کا تقابلی جائزہ بھی پیش کیا۔
اجلاس میں پٹرولیم مصنوعات سے متعلق اوگرا کی پیش کردہ سفارشات پر بھی غور کیا گیا۔
وزیر اعظم نے کہا حکومت کی اولین ترجیح غریب عوام کو ریلیف فراہم کرنا ہے۔ انھوں نے بالواسطہ ٹیکسوں کے بوجھ میں کمی لانے سے متعلق حل تجویز کرنے کی ہدایت کرتے ہوئے کہا ایسے اقدامات اٹھائیں کہ غریب افراد پر بالواسطہ ٹیکسوں کے بوجھ کو کم کیا جا سکے۔
وزیر اعظم نے کہا ایسے اقدامات اٹھائیں کہ ملک کو مزید قرضوں میں جانے سے بھی بچایا جا سکے، گندم پر اٹھنے والے انتظامی اخراجات کے ہر پہلو کا تفصیلی جائزہ لیا جائے، اور ایسا نظام وضع کریں جس سے اخراجات کی مد میں ہر ایک روپے کی بچت ہو سکے۔
