اسلام آباد : وزیراعظم عمران خان کی زیرصدارت وفاقی کابینہ کا اجلاس آج ہوگا، جس کے لئے 9نکاتی ایجنڈا جاری کردیا گیا ہے، اجلاس میں اہم فیصلوں کا امکان ہے۔
تفصیلات کے مطابق اسلام آباد میں وزیراعظم عمران خان کی زیرصدارت وفاقی کابینہ کا تیسرا اجلاس آج سہ پہر 3 بجے ہوگا، جس میں وفاقی کابینہ 9 نکاتی ایجنڈے پر غور کرے گی۔
اجلاس میں حکومت کے 100روزہ پلان پرعملدرآمد کا جائزہ لیا جائے گا جبکہ وفاقی حکومت کی طرف سے افسران کے تقرر اور تبادلوں پر غور ہوگا اور سول لا ریفارمز سے متعلق ٹاسک فورس کے قیام کا جائزہ لیا جائے گا۔
نیب قوانین کی اصلاحات سے متعلق ٹاسک فورس کا قیام بھی ایجنڈے میں شامل ہیں۔
وفاقی کابینہ کے اجلاس میں سول سروس اصلاحات، وفاقی حکومت کی تنظیم نو پر ٹاسک فورس کا جائزہ لیا جائے گا اور کفایت شعاری مہم سے متعلق اور صلاحات سے متعلق ٹاسک فورس کے قیام کی منظوری بھی دی جائے گی۔
اجلاس کے دوران مون سون کے دوران شجر کاری مہم پر بریفنگ دی جائے اور پلانٹ فار پاکستان مہم کی منظوری دیئے جانے کا بھی امکان ہے جبکہ داخلی اورخارجی امورپر بھی بریفنگ دی جائے گی۔
یاد رہے کہ عمران خان نے وزیراعظم بننے کے بعد وفاقی کابینہ پہلے اجلاس میں سابق وزیراعظم نواز شریف اور ان کی صاحبزادی مریم نواز کا نام ایگزٹ کنٹرول لسٹ ( ای سی ایل) میں ڈالنے کی منظوری دی تھی۔
وفاقی کابینہ کے 24 اگست کو ہونے والے دوسرے اجلاس میں صدر، وزیراعظم، وزرا اور ارکان پارلیمنٹ کے صوابدیدی فنڈز ختم کرنے کی منظوری دی گئی تھی۔
واضح رہے پنجاب کابینہ کے اجلاس میں فیصلہ کیا گیا تھا کہ وزیرِ اعظم عمران خان ہر ہفتے جمعہ اور منگل کو کابینہ اجلاس کی صدارت کریں گے۔
0
20
