کراچی: وزیرِ اعظم عمران خان نے جو کہا وہ کر دکھایا، ان کی زیرِ صدارت اجلاس گورنر ہاؤس کی بجائے اسٹیٹ گیسٹ ہاؤس میں منعقد ہوں گے۔
تفصیلات کے مطابق وزیرِ اعظم نے فیصلہ کیا ہے کہ گورنر ہاؤس سندھ کو اجلاسوں کے لیے استعمال نہ کیا جائے، کراچی آمد پر ان کی زیرِ صدارت اجلاس اسٹیٹ گیسٹ ہاؤس میں ہوگا۔
ماضی میں تمام اجلاس گورنر ہاؤس میں ہوا کرتے تھے، تمام اجلاسوں کی صدارت وزیرِ اعظم گورنر ہاؤس میں کرتے تھے، تاہم وزیرِ اعظم عمران خان گورنر ہاؤس میں صرف ڈیم فنڈز مہم کےعشائیے میں شرکت کریں گے۔
[bs-quote quote=”وزیرِ اعظم عمران خان کل کراچی کے دورے پر آئیں گے” style=”style-7″ align=”left” color=”#dd3333″][/bs-quote]
وزیرِ اعظم عمران خان سب سے پہلے مزارِ قائد پر حاضر ی دیں گے، اس کے بعد محترمہ فاطمہ جناح اور ملک کے پہلے وزیرِ اعظم لیاقت علی خان کی قبروں پر بھی فاتحہ خوانی کریں گے۔
کراچی میں جاری ترقیاتی منصوبوں پر وزیرِ اعظم کی زیرِ صدارت اجلاس میں انھیں گرین لائن منصوبے، کے فور اور کراچی پیکیج پر بریفنگ دی جائے گی، وزیرِ اعظم کے دورۂ کراچی میں امن و امان سے متعلق اجلاس بھی ہوگا۔
یہ بھی پڑھیں: سرکاری اساتذہ کے بچے سرکاری اسکول میں تعلیم حاصل کریں گے
امن و امان سے متعلق اجلاس میں گورنر سندھ عمران اسماعیل، وزیرِ اعلیٰ سندھ، کور کمانڈر کراچی، ڈی جی رینجرز اور آئی جی سندھ شرکت کریں گے۔
اپنے دورے کے دوران وزیرِ اعظم اسٹیٹ گیسٹ ہاؤس میں تاجروں اور نمایاں شخصیات سے بھی ملاقاتیں کریں گے، ملاقاتوں کے بعد وہ اتوار کی رات ہی اسلام آباد روانہ ہو جائیں گے۔
خیال رہے کہ وزیرِ اعظم عمران خان کل کراچی آئیں گے، انھیں کراچی آپریشن پر بریفنگ دی جائے گی، ایم کیو ایم کا وفد بھی ملاقات کرے گا، ضمنی انتخابات سمیت دیگر امور زیرِ غور آئیں گے۔
