اسلام آباد : وزیر اعظم عمران خان نے کہا ہے کہ حکومت کشمیری عوام کی اخلاقی، سیاسی اور سفارتی حمایت جاری رکھے گی، اقوام متحدہ مسئلہ کشمیر کے حل کیلئے مؤثر کردار ادا کرے۔
ان خیالات کا اظہار انہوں نے اسلام آباد میں صدر آزاد کشمیر مسعود خان سے ملاقات کے موقع پر کیا۔ تفصیلات کے مطابق وزیراعظم عمران خان سے صدر آزاد کشمیر مسعود خان نے ملاقات کی۔
ملاقات میں کشمیر کی موجودہ صورتحال اور باہمی دلچسپی کے امور پرتبادلہ خیال کیا گیا۔ آزاد کشمیر کے صدر مسعود خان نے اسلام آباد میں عمران خان سے ملاقات کر کے انہیں وزیراعظم کا عہدہ سنبھالنے پر مبارکباد دی۔
اس موقع پر دونوں شخصیات میں آزاد کشمیر کی صورتحال، امن وامان اور سماجی و معاشی ترقی سے متعلق گفتگو ہوئی۔صدر آزاد کشمیر نے وزیراعظم کو مقبوضہ کشمیر کے عوام پر بھارتی فوج مظالم سے آگاہ کیا۔
اس موقع پر وزیر اعظم عمران خان نے بھارتی ظلم وبربریت اور انسانی حقوق کی سنگین خلاف ورزیوں کی شدید الفاظ میں مذمت کی،ان کا کہنا تھا کہ عالمی برادری مقبوضہ کشمیر میں انسانی حقوق کی خلاف ورزیوں کا سختی سے نوٹس لے۔
مزید پڑھیں: وزیراعظم عمران خان سے ایرانی وزیر خارجہ جواد ظریف کی ملاقات
وزیراعظم نے مزید کہا کہ اقوام متحدہ مسئلہ کشمیر حل کرنے کیلئے اپنا مؤثر کردار ادا کرے، پاکستان مقبوضہ کشمیر کے عوام کی اخلاقی، سیاسی اور سفارتی حمایت جاری رکھے گا۔
