اسلام آباد: آج وزیر اعظم عمران خان سے گورنرسندھ عمران اسماعیل نے اہم ملاقات کی، جس میں سیاسی صورت حال پر تبادلہ خیال کیا گیا.
تفصیلات کے مطابق گورنر سندھ نے وزیر اعظم آفس میں عمران خان سے ملاقات کی. اس ملاقات میں سندھ کی موجودہ سیاسی صورت حال زیر بحث آئی.
اس موقع پر وزیراعظم نے کہا کہ کراچی کے عوام نے پی ٹی آئی کو بھاری مینڈیٹ دیا ہے، شہر کے مسائل کا حل ہماری ترجیحات میں شامل ہے.
اس موقع پر وزیراعظم نے کراچی کے ترقیاتی منصوبوں کے لئےفنڈز کی فراہمی کی یقین دہانی کرتے ہوئے کہا کہ کراچی حکومت کی ترجیحات کا حصہ ہے.
مزید پڑھیں: صدر اور وزیراعظم کا سال نو پر نیک تمناؤں کا اظہار
واضح رہے کہ گذشتہ چند روز کے دوران وفاقی حکومت اور سندھ حکومت کے درمیان خاصا تناؤ رہا. وزیر اعلیٰ سندھ مراد علی شاہ کا نام ای سی ایل میں شامل ہونے کے بعد پی ٹی آئی، سندھ کی قیادت نے ان سے مستعفی ہونے کا مطالبہ کیا.
اس دوران گورنر راج کی بازگشت بھی سنائی دی اور فواد چوہدری کے دورہ سندھ کو بھی اسی تناظر میں دیکھا گیا. البتہ بعد میں پی ٹی آئی کی جانب سے موقف اختیار کیا گیا کہ ان کا مطالبہ فقط وزیر اعلیٰ کا استعفیٰ ہے.
