اسلام آباد : وزیراعظم عمران خان نے اوورسیز پاکستانیوں کو ملکی ترقی میں شامل کرنے کے لئے اہم قدم اٹھاتے ہوئے خصوصی سرٹیفکیٹس جاری کرنے کا فیصلہ کیا ہے، فیصل جاوید کا کہنا ہے کہ وزیراعظم عمران خان سرٹیفکیٹ لانچنگ تقریب سےخطاب کریں گے۔
تفصیلات کے مطابق وزیراعظم عمران خان نے اوورسیز پاکستانیوں کو ملکی ترقی میں شامل کرنے کے لئے خصوصی سرٹیفکیٹس جاری کرنے کا فیصلہ کیا ہے، "پاکستان بناؤ سرٹیفکیٹ” لانچنگ تقریب 31 جنوری کو ہو گی۔
فیصل جاوید کا کہنا ہے کہ وزیراعظم عمران خان لانچنگ تقریب سےخطاب کریں گے، تقریب کی ٹیگ لائن”منافع آپ کا مستقبل پاکستان کا”ہوگی۔
سرٹیفکیٹس کے ذریعے اوور سیز پاکستانیوں کو منافع دیا جاسکے گا۔
مزید پڑھیں : پاکستان بناؤ سر ٹیفیکٹ کی مدت تین سال اورپانچ سال ہوگی، وزارت خزانہ
یاد رہے چند روز قبل وزارت خزانہ کا کہنا تھا کہ پاکستان بناؤ سر ٹیفیکٹ کا اجراء رواں ماہ کیا جائےگا ، بانڈز کی مدت تین سال اورپانچ سال ہوگی، تین سالہ بانڈز پر شرح منافع چھ اعشاریہ دوپانچ فیصد جبکہ پانچ سالہ بانڈز پر شرح منافع چھ اعشاریہ سات پانچ فیصد ہوگی۔
وزارت خزانہ نے کہا تھا کہ بانڈز بیک وقت پوری دنیا میں موجود پاکستانیوں کے لئے جاری کئے جائیں گے، پاکستان پہلی بار سمندر پار پاکستانیوں کے لئے ایسی اسکیم لارہاہے، یہ اوپن اینڈ ٹرانزیکشن ہوگی اور حجم کا تعین سرمایہ کاروں کے رسپانس کے مطابق طے کیا جائےگا۔
وزارت خزانہ کے مطابق پاکستان بچاؤ سرٹیفیکیٹ کے علاوہ حکومت کو مزید عالمی قرض مارکیٹ میں ٹرانزیکشن کی ضرورت نہیں ہوگی، یہ سرٹیفیکیٹس بیرون ملک مقیم پاکستانیوں کو ان کے نائی کوپ پر دئے جائیں گے۔
خیال رہے نومبر 2018 میں وزیراعظم پاکستان عمران خان نے بیرون ملک مقیم پاکستانیوں کے لئے نائیکوپ کی شرط ختم کردی تھی، اب بیرون ملک مقیم پاکستانیوں کو نائیکوپ کارڈ کی ضرورت نہیں ہوگی، دہری شہریت کے حامل پاکستانی پاسپورٹ دکھا کر وطن آسکیں گے۔
