اسلام آباد :وزیراعظم عمران خان نے سٹیزن پورٹل پر خاتون کی ہراسگی سے متعلق شکایت پر غفلت برتنے والے افسران فوری معطل کرنے کی ہدایت کردی۔
تفصیلات کے مطابق سٹیزن پورٹل پرشکایت کےحل میں غفلت برتنے پر وزیراعظم نے نوٹس لیتے ہوئے ڈی جی ایف آئی اےکومتعلقہ افسران فوری معطل کرنے کی ہدایت کردی۔
خاتون نے5مرتبہ شکایت درج کی لیکن ایف آئی اے افسران نے کوئی کارروائی نہ کی ، وزیراعظم نے متعلقہ افسران کے خلاف انکوائری کرکے سخت ایکشن کی ہدایت کی ہے۔
وزیراعظم آفس کا کہنا ہے کہ خاتون نےہراسگی کےباعث یونیورسٹی سےنوکری چھوڑ دی تھی اور ایف آئی اے کے عدم تعاون کی وجہ سےخاتون نےمبینہ خود کشی کی کوشش کی۔
16دسمبر2019 سے 13جون 2021 تک ایف آئی اے نے شکایت نظراندازکی، 2بار شکایت ری اوپن کےباوجودایف آئی اےنے ذمہ داری میں کوتاہی برتی، جس کے بعد خاتون شوہرکےہمراہ ایف آئی اے کے خلاف شکایت لے کروزیراعظم آفس پہنچ گئی۔
وزیراعظم آفس نے سخت ایکشن اور متعلقہ افسران کےخلاف کارروائی کی یقین دہانی کرائی اور وزیراعظم ڈلیوری یونٹ نےڈی جی ایف آئی اےکومراسلہ جاری کردیا۔
جس میں کہا گیا کہ اعلیٰ سطح تحقیقات کراکرمتعلقہ افسران کےخلاف کارروائی کی جائے اور خاتون کوجلدازجلدریلیف فراہم کیاجائے ، کسی بھی شہری کی شکایت پرغفلت برتنے کی اجازت نہیں دی جائے گی۔
وزیراعظم نے سٹیزن پورٹل پرشکایات کوغیرسنجیدہ لینےوالوں کےخلاف کارروائی کاعندیہ دے دیا ، وزیراعظم آفس کا کہنا ہے کہ انکوائری رپورٹ وزیراعظم کو 20 جولائی 2021 کوپیش کی جائےگی۔