اسلام آباد: وزیراعظم عمران خان نے کالعدم تحریک لبیک پاکستان کی جانب سے پر تشدد واقعات میں شہید و زخمی ہونے والے پولیس فورس کے جوانوں کو خراج تحسین پیش کیا ہے۔
تفصیلات کے مطابق سماجی رابطے کی ویب سائٹ ٹوئٹر پر جاری اپنے بیان میں وزیراعظم عمران خان نے کہا کہ حکومت کو بلیک میل ،انتشار پھیلانےکی منظم کوشش کو پولیس نے روکا، اس دوران چار پولیس اہلکار شہید اور چھ سو سے زائد زخمی ہوئے۔
وزیراعظم عمران خان نے کہا کہ قوم پولیس ہیروز کی مقروض ہے، حکومت شہدا کے اہلخانہ کی مکمل ذمہ داری لے گی۔
I want to pay special tribute to our police force for their heroic stand against organised violence intended to create chaos to blackmail govt. 4 policemen were martyred & over 600 injured. Our nation is indebted to these heroes & we will look after the families of the martyrs.
— Imran Khan (@ImranKhanPTI) April 16, 2021
یاد رہے وفاقی حکومت نے انسداد دہشت گردی ایکٹ کے تحت تحریک لبیک پاکستان پر پابندی عائد کردی ہے، وفاقی کابینہ کی جانب سے مذہبی سیاسی جماعت پر پابندی عائد کرنے کی سمری کی منظوری کے بعد وزارت داخلہ کی جانب سے ایک نوٹیفکیشن جاری کیا گیا تھا۔
وزارت داخلہ کی سمری میں تحریک لبیک پاکستان پر اس کے چیف سعد رضوی کی گرفتاری کے بعد کی پرتشدد سرگرمیوں کی وجہ سے پابندی عائد کرنے کی سفارش کی گئی تھی ، جس کے نتیجے میں دو پولیس اہلکار شہید اور 300 سے زائد زخمی ہوگئے تھے۔
دوسری جانب نیشنل کاؤنٹر ٹیریرئز اتھارٹی (نیکٹا) کی جانب سے بھی کالعدم تحریک لبیک پاکستان کو کالعدم تنظیموں کی فہرست میں شامل کردیا گیا ہے۔ تحریک لبیک کالعدم قرار دی جانے والی 79ویں تنظیم بن گئی ہے۔ کالعدم تنظیم کے خلاف حکومت کی جانب سے کریک ڈاؤن اور پکڑ دھکڑ کا آغاز تنظیم کی جانب سے پر تشدد احتجاج اور دھرنوں کے باعث ہوا۔