اسلام آباد : وزیراعظم نے وفاقی کابینہ کا اجلاس جمعرات کو طلب کرلیا، جس میں 50لاکھ گھروں کی اسکیم کی لانچنگ کی حتمی منظوری دی جائے گی۔
تفصیلات کے مطابق وزیراعظم عمران خان نے وفاقی کابینہ کا اجلاس جمعرات کو طلب کرلیا، جس میں ملک کی داخلی اورمعاشی صورتحال کاجائزہ لیا جائے گا۔
ذرائع کا کہنا ہے کہ وفاقی کابینہ کے اجلاس میں پہلے 100دن کے پروگرام سے متعلق بریفنگ دی جائےگی اور نئے آئی ایم ایف پروگرام، ایف اے ٹی ایف سے مذاکرات پر اعتماد میں لیا جائے گا۔
کابینہ اجلاس میں 50لاکھ گھروں کی اسکیم کی لانچنگ کی حتمی منظوری دی جائےگی۔
اجلاس میں شہبازشریف کی گرفتاری اور ناجائز اثاثہ جات کی واپسی اورنیب کی کارکردگی پر بھی غور کیا جائے گا جبکہ بےلاگ احتساب جاری رکھنے پر بھی کابینہ کو اعتماد میں لیا جائے گا
وفاقی کابینہ اجلاس میں کلین گرین پاکستان مہم کےحوالے سے ہدایات جاری کی جائیں گی۔
گذشتہ روز وزیراعظم عمران خان نےکلین اینڈ گرین پاکستان مہم کاافتتاح کیااور تقریب سے خطاب میں کہا تھا کہ مہم صرف حکومت کامیاب نہیں بناسکتی سب کو کردار اداکرناہے،ہفتے کوملک بھرمیں مہم کا باقاعدہ آغاز ہوگا۔
وزیراعظم کا کہنا تھا کہ شہر دیہات اور دریا صاف رکھنے ہیں، پاکستان میں ٹوائلٹس کی کمی پوری کریں گے تاکہ سیاحت بڑھے ، نیا پاکستان نئی سوچ سے بنےگا، قوم ساتھ دے یہ ہمارے بچوں کےمستقبل کا سوال ہے۔
خیال رہے کہ وزیراعظم عمران خان 50 لاکھ سستے گھروں کی پالیسی کا اعلان 10 اکتوبر کو کریں گے، قیمت پندرہ لاکھ روپے تک رکھنے کا امکان ہے۔
