اسلام آباد: وزیراعظم عمران خان نے کہا ہے کہ دنیا کشمیر کے غیرقانونی الحاق اور بھارتی فوج کے قبضے پر کارروائی کرے۔
تفصیلات کے مطابق وزیراعظم عمران خان سے امریکی اور برطانوی انسانی حقوق کے ماہر وکلا نے ملاقات کی، ملاقات میں وزیراعظم کے معاون خصوصی شہزاد اکبر بھی موجود تھے۔
وزیراعظم نے مظلوم کشمیری عوام پر مظالم کو اجاگر کیا، ملاقات میں مقبوضہ کشمیر میں انسانی حقوق کی سنگین خلاف ورزیوں پر بھی غور کیا گیا۔
وزیراعظم نے کہا کہ مقبوضہ کشمیر میں انسانی حقوق کی خلاف ورزیاں عالمی برادری کے ضمیر کا ٹیسٹ ہے، دنیا کشمیر کے غیرقانونی الحاق اور بھارتی فوج کے قبضے پر کارروائی کرے۔
عمران خان نے کہا کہ کشمیری عوام کی اخلاقی، سیاسی اور سفارتی حمایت جاری رکھیں گے، مظلوم کشمیری عوام کی حق خود ارادیت کی حمایت جاری رہے گی۔
Prominent British Human Rights lawyer Mr. Clive Stafford and American International Law expert Mr. Eric Lewis called on Prime Minister Imran Khan today. SAPM Barrister Shahzad Akbar was also present during the meeting. pic.twitter.com/NFiX1BtJZ3
— Prime Minister's Office, Pakistan (@PakPMO) December 13, 2019
انہوں نے کہا کہ سلامتی کونسل کی قراردادوں کے مطابق کشمیریوں کو حق خود ارادیت دیا جائے، کشمیریوں کی خواہش کے مطابق مسئلے کے حل تک حمایت جاری رہے گی۔
واضح رہے کہ آرٹیکل 370 کی منسوخی کے بعد سے مقبوضہ کشمیر میں کرفیو برقرار ہے، وادی میں اسکول، کالجز اور تجارتی مراکز بند ہیں، مقبوضہ وادی میں نظام زندگی پوری طرح مفلوج ہوچکا ہے۔
مقبوضہ کشمیر میں لاک ڈاؤن کے باعث کشمیریوں کو شدید مشکلات کا سامنا ہے، کرفیو اور پابندیوں کے باعث اب تک مقامی معیشت کو ایک ارب ڈالر کا نقصان ہوچکا ہے جبکہ ہزاروں لوگ بے روزگار ہوچکے ہیں۔
