گھوٹکی: وزیراعظم عمران خان آج گھوٹکی میں جلسہ عام سے خطاب کریں گے، شاہ محمود قریشی سمیت دیگر وزرا بھی وزیرعظم کے ہمراہ ہوں گے۔
تفصیلات کے مطابق وزیراعظم عمران خان گھوٹکی میں آج دوپہر بذریعہ ہیلی کاپٹر پہنچیں گے جہاں وہ خان گڑھ میں جلسہ عام سے خطاب کریں گے۔
جلسے میں وزیرخارجہ شاہ محمود قریشی، شیخ رشید اور وفاقی کابینہ کے دیگر وزرا بھی شرکت کریں گے۔
پاکستان تحریک انصاف کے کارکنوں نے گھوٹکی میں جلسے کی تیاریاں مکمل کرلی ہیں۔
سردار علی گوہر مہر کے مطابق جلسہ گاہ میں 4 سے 5ہزار کرسیاں لگا دی گئی ہیں جبکہ 62 فٹ لمبا، 40 فٹ چوڑا اور 9 فٹ اونچا اسٹیج تیار کیا گیا ہے۔
جلسے کے بعد وزیراعظم عمران خان کو ظہرانہ دیا جائے گا، جی ڈی اے کے رہنما وزیراعظم سے ملاقات کریں گے۔
آنے والے دنوں میں گوادر کی ترقی سے پوری دنیا کو فائدہ ہوگا: وزیراعظم
یاد رہے کہ گزشتہ روز وزیراعظم عمران خان نے بلوچستان کا دورہ کیا تھا اور گوادر میں انٹرنیشنل ایئرپورٹ، کوئٹہ میں بلوچستان ہیلتھ کمپلیکس کا سنگ بنیاد رکھا تھا۔
وزیراعظم عمران خان کا تقریب سے خطاب کرتے ہوئے کہنا تھا کہ گوادر کی ترقی سے پورے خطے کو فائدہ ہوگا اور گوادر کو بجلی کی نیشنل گرڈ سے جوڑا جائے گا۔
