اسلام آباد : وزیراعظم عمران خان اکتوبر کے وسط میں اپنے دوسرے غیر ملکی دورے پر چین جائیں گے ، عمران خان کےہمراہ اعلیٰ سطحی وفد بھی چین جائے گا۔
تفصیلات کے مطابق سعودی عرب کے بعد وزیراعظم عمران خان کا چین کے دورے کا امکان ہے ، عمران خان اکتوبر کے وسط میں چین کادورہ کریں گے، ان کے ہمراہ اعلیٰ سطحی وفد بھی چین جائے گا۔
پاکستانی وفد چین میں کانفرنس میں بھی شرکت کرے گا۔
ذرائع کا کہنا ہے کہ سی پیک میں تیزی اورمعاشی تعاون پربھی بات ہوگی، اقتصادی شعبےمیں تعاون پر بھی تبادلہ خیال ہوگا۔
دورے کی حتمی تاریخوں اورملاقاتوں کو حتمی شکل دی جارہی ہے۔
یاد رہے وزیراعظم عمران خان اپنے پہلے غیر ملکی دورے پرسعودی عرب پہنچے تھے ، جہاں انھوں نے سعودی فرمانروا اور ولی عہد محمد بن سلمان سے ملاقات کی۔
وزیراعظم عمران خان کوسعودی شاہ محل میں گارڈ آف آنربھی پیش کیا گیا، وزیراعظم اور ان کے وفد کےاعزاز میں شاہی ضیافت کا اہتمام بھی کیا گیا، وزیراعظم عمران خان نے وفد کے ہمراہ عمرہ بھی ادا کیا، اس موقع پر عمران خان کے لیے بیت اللہ کا دروازہ خصوصی طور پر کھولا گیا۔
وزیراعظم عمران خان وفد کے ساتھ بیت اللہ شریف میں داخل ہوئے، وزیراعظم نے وہاں نوافل ادا کیے انہوں نے پاکستان اور عالم اسلام کی سلامتی کی دعا مانگی۔
بعد ازاں وزیراعظم عمران خان سے سعودی وزير توناائی خالدالفالح، صدر سعودی انویسٹمنٹ فنڈ، ایڈوائزر سعودی کابینہ نے بھی ملاقات کی، ملاقات میں تجارت، سرمایہ کاری اور اقتصادی تعلقات پر تبادلہ خیال کیا گیا۔
وزیراعظم نے سعودی عرب میں پاکستانی کمیونٹی سے خطاب میں بتایا کہ5لاکھ گھروں کی تعمیر فوری شروع کررہے ہیں، تعمیر میں سرمایہ کاری کے لیے اوورسیز پاکستانیوں کو مدعو کریں گے۔
