The news is by your side.

Advertisement

سابق فاٹا کےعوام کوقومی دھارےمیں شامل کرنے کا ایک اور وعدہ پورا کردیا، وزیراعظم

اسلام آباد : وزیراعظم عمران خان کا کہنا ہے کہ سابق فاٹاکے عوام کو قومی دھارےمیں شامل کرنے کا ایک اور وعدہ پورا کردیا، باجوڑ میں تھری جی سروس لانچ کردی گئی ہے۔

تفصیلات کے مطابق وزیراعظم عمران خان نے سماجی رابطے کی ویب سائٹ ٹوئٹر پر اپنے پیغام میں کہا سابق فاٹاکےعوام کوقومی دھارے میں شامل کرنے کا ایک اور وعدہ پورا کردیا، گزشتہ جمعےکو باجوڑ کے عوام سے تھری جی سروس کا وعدہ کیا تھا اور آج باجوڑ کی تحصیل خاورمیں تھری جی سروس لانچ کردی گئی ہے۔

گذشتہ روز وزیراعلیٰ خیبر پختونخوا محمود خان نے سوشل میڈیا پر ایک ویڈیو پیغام کا کہنا تھا تھری جی سروس کا کام مکمل کرلیا گیا ہے، باجوڑ میں تھری جی سروس کل سے باضابطہ شروع کردی جائے گی۔

محمود خان کا کہنا تھا وزیراعظم عمران خان کی قبائلی عوام سے محبت کا اظہار ہے کہ وہ قبائلی عوام کے مطالبات اور ان کی بنیادی سہولیات کا خیال رکھتے ہیں، باجوڑ جلسے کے دوران قبائلی نوجوانوں نے وزیراعظم سے تھری جی سروس کی درخواست کی تھی، قبائلی نوجوانوں کو تھری جی سروس مبارک ہو۔

یاد رہے چند روز قبل وفاقی حکومت نے قبائلی علاقوں میں سرکاری ٹی وی کی نشریات بحال کرنے کا فیصلہ کیا تھا ، فیصلہ وزیراعظم کے باجوڑ جلسہ کے بعد کیا گیا، دہشت گردی کی کارروائیوں میں بوسٹرز تباہ کر دیے گئے تھے۔

مزید پڑھیں : وفاقی حکومت کا قبائلی علاقوں میں سرکاری ٹی وی کی نشریات بحال کرنے کا فیصلہ

اس سلسلے میں وفاقی حکومت نے آئی جی ایف سی سے رابطہ کیا اور قبائلی عوام کو اطلاعات و نشریات تک رسائی دینے پر مشاورت کی گئی ، حکومت کا کہنا ہے قومی و سیاسی امور پر اطلاعات کا حصول آسان بنایا جائے۔

آئی جی ایف سی سمیت سیکیورٹی اداروں نے اہم فیصلے پر اتفاق کرلیا ہے ، سرکاری ٹی وی کے بوسٹرز کی دوبارہ تنصیب پر کام شروع کر دیا گیا ہے، قبائلی اضلاع میں سرکاری ٹی وی کی نشریات کا آغاز جلدشروع ہو گا۔

واضح رہے باجوڑ میں جلسے سے خطاب کرتے ہوئے وزیراعظم عمران خان کا کہنا تھا کہ قبائلی علاقے کے لوگوں کو جنگ سے بہت نقصان پہنچا لیکن ہر مشکل کے بعد اللہ آسانی پیدا کرتا ہے، انشااللہ قبائلی علاقوں کا آسانی کا وقت شروع ہوگیا ہے۔

عمران خان کا کہنا تھا کہ باجوڑمیں انٹرنیٹ آناچاہئے، باجوڑ کا نوجوان شعور رکھتا ہے، پہلی کوشش باجوڑ میں انٹرنیٹ پہنچانے کی کریں گے، قبائلی علاقوں میں جنگ کی وجہ سےتباہی ہوئی، اسلام آباد پہنچتے ہی باجوڑ میں انٹرنیٹ پہنچانے کی کوشش کروں گا۔

Comments

comments

یہ بھی پڑھیں