اسلام آباد :وزیراعظم عمران خان ایک روزہ دورے پر لاہور پہنچ گئے، جہاں وہ ایوان وزیر اعلی میں پارلیمانی پارٹی کے اجلاس کی صدارت کریں گے جبکہ نیا پاکستان ہاوسنگ سکیم لیبر کارڈ اور پنجاب میں ٹوریزم کے حوالے سے وزیر اعظم کو بریفنگ دی جائے گی۔
تفصیلات کے مطابق وزیر اعظم عمران خان اصوبائی درالحکومت لاہور پہنچ گئے ، دورہ کے دوران وہ وزیر اعلی پنجاب سے ملاقات کریں گے جبکہ ایوان وزیر اعلی لاہور میں وزیر اعظم پی ٹی آئی کے پارلیمانی پارٹی کے اجلاس کی صدارت بھی کریں گے۔
عمران خان پارلیمانی پارٹی اجلاس میں پارٹی کے اندر موجود دھڑے بندیوں اور ارکان اسمبلی کی تنخواہوں کے بل کے حوالے سے بھی پارلیمانی پارٹی کو بھی اعتماد میں لیں گے۔
ذرائع کا کہنا ہے کہ وزیر اعظم کو نیا پاکستان ہاوسنگ پروجیکٹ میں ہونے والی پیش رفت ،مزدوروں کے لیے لیبر کارڈ پالیسی اور پنجاب میں سیاحت کے حوالے سے نئے مقامات کا جائزہ رپورٹ بھی پیش کی جائے گی۔
مزید پڑھیں : وزیر اعظم عمران خان نے لاہور میں جناح ایکسپریس ٹرین کا افتتاح کردیا
یاد رہے 30 مارچ کو وزیر اعظم عمران خان نے لاہور میں جناح ایکسپریس ٹرین کا افتتاح کیا تھا ، تقریب سے خطاب میں وزیراعظم نے کہا پاکستان میں چین کی مدد سے ٹرینوں کاجال بچھا دیں گے، پاکستان میں تمام کمزورطبقے کو ہیلتھ کارڈ ملنا چاہیے، اصولی طورپرمزدوروں کی تنخواہوں میں اضافے کے حق میں ہوں، جتنی مہنگائی ہے، مزدوروں کی تنخواہ بڑھنی چاہیے، میں جھوٹے وعدے نہیں کروں گا۔
عمران خان کا کہناتھا انگریزجوپٹری بناکرگیا تھا، وہ آج کم ہوگئی ہے، ٹرین عام آدمی استعمال کرتا ہے، غریب طبقے کے لئے ہیلتھ انشورنس شروع کررہے ہیں، موٹر ویزاورشاہراہیں اشرافیہ کے لئے ہیں، جمہوری وزیراعظم ہوں،سوچ سمجھ کربجٹ کےمطابق مالی فیصلےکرتا ہوں۔
انھوں نے کہا تھا وزارت پٹرولیم سےکہوں گا کہ فریٹ کے لئے ریلوےکو استعمال کیا جائے، ریلوے سیاحت میں ہمیں بہت مدد گار ثابت ہوگی، جن کی چھٹیاں لندن میں ہوتی تھیں، انھیں کیا پتا کہ پاکستان میں کتنی سیاحت ہے۔
