اسلام آباد : ملک کو معاشی بحران سے کیسے نکالا جائے، وزیراعظم عمران خان کل سے غیرملکی دوروں کا آغاز کریں گے، عمران خان 12 دنوں میں 3 ممالک کا اہم ترین دورہ کریں گے۔
تفصیلات کے مطابق ملک کو معاشی بحران سے نکالنے کی ذمہ داری وزیراعظم نے خود سنبھال لی اور کل سےغیرملکی دوروں کا آغاز کرنے جارہے ہیں، عمران خان 12 دنوں میں 3 ممالک کا اہم ترین دورہ کریں گے۔
وزیراعظم سعودی عرب ،ملائشیا اورچین جائیں گے،عمران خان کل دورہ سعودی عرب کے سلسلے میں مدینہ منورہ پہنچیں گے، منگل کو ریاض میں سعودی حکام سے اہم ملاقاتیں کریں گے، جس میں سعودی قیادت کےساتھ معاشی تعاون کے پر بات چیت ہوگی۔
عمران خان پاکستان واپسی پر سرمایہ کاروں ،صنعتکاروں کے ساتھ اعلی سطحی میٹنگز کریں گے اور سرمایہ کاروں کے ساتھ ملاقاتوں کا سلسلہ 3 روز تک جاری رہے گا۔
وزیراعظم 28 اکتوبر کو ملائشیا کے دورے پر روانہ ہوں گے، جہاں ملائشین وزیراعظم ڈاکٹر مہاتیر محمد سے اقتصادی تعاون پربات کریں گے اور دورہ مکمل کر کے 29 اکتوبر کو وطن واپس آئیں گے۔
وطن واپسی پر دورہ چین سے متعلق معاشی ٹیم سے بریفنگز لیں گے اور 3 نومبر کو چین روانہ ہوں گے، دورہ چین کے دوران چینی قیادت کے ساتھ سی پیک اور معاشی پیکج پر اہم پیش رفت کا امکان ہے۔
مزید پڑھیں : ہوسکتا ہے، آئی ایم ایف کے پاس نہ جانا پڑے، دوست ممالک سے بات کر رہے ہیں: وزیراعظم
ذرائع کے مطابق اگر وزیراعظم کے غیر ملکی دورے کامیاب ہوئے تو آئی ایم ایف کے آپشن پر نظرثانی ہوسکتی ہے۔
یاد رہے چند روز قبل وزیر اعظم عمران خان کا کہنا تھا کہ ہوسکتا ہے، آئی ایم ایف کے پاس نہ جانا پڑے، دوست ممالک سے بات کر رہے ہیں، توقع ہے کہ اپنی پالیسیوں سے بہت جلد مسائل پرقابوپالیں گے، ہوسکتا ہے کہ ہمیں آئی ایم ایف کے پاس نہ جانا پڑے، چاہتےہیں کہ عام آدمی کی مشکلات کو کم کیاجائے۔
عمران خان کا کہنا تھا کہ ملکی اقتصادی مسائل کی وجہ سے میڈیا کو بھی مشکلات درپیش ہیں، ملکی معیشت کو درپیش چیلنجزسے نمٹنا اولین ترجیح ہے، مشکل فیصلے کر رہے ہیں، مگران کے مثبت نتائج ملیں گے۔
0
20
