اسلام آباد: وزیر اعظم عمران خان رواں ماہ سعودی عرب کا دورہ کریں گے، ذرایع کا کہنا ہے کہ وزیر اعظم 30 مئی کو جدہ پہنچیں گے۔
تفصیلات کے مطابق وزیر اعظم عمران خان سعودی عرب کے دورے پر 30 مئی کو جدہ پہنچیں گے، جب کہ وزیر خارجہ شاہ محمود قریشی 27 مئی کو جدہ روانہ ہوں گے۔
وزیر اعظم او آئی سی سربراہ مملکت کے اجلاس میں شرکت کریں گے، او آئی سی سربراہ اجلاس 30 اور 31 مئی کو ہوگا، وزیر اعظم 31 مئی کو او آئی سی اجلاس سے خطاب کریں گے۔
ذرایع کا کہنا ہے کہ وزیر اعظم کو سربراہ اجلاس میں شرکت کی با قاعدہ دعوت دی گئی ہے، دورے کے دوران وزیر اعظم اعلیٰ سعودی قیادت سے ملاقاتیں کریں گے۔
یہ بھی پڑھیں: وزیراعظم کا پاکستانی قیدی رہا کرنے پر یو اے ای کے ولی عہد کا شکریہ
ذرایع کے مطابق وزیر اعظم عمران خان عمرہ بھی ادا کریں گے، سعودی فرماں روا شاہ سلمان اور ولی عہد شہزادہ بن محمد سلمان سے ملاقات کریں گے۔
ذرایع نے بتایا کہ وزیر اعظم عمران خان کی وطن واپسی 31 مئی کی رات ہی کو ہوگی۔
دوسری طرف وزیر خارجہ شاہ محمود قریشی 27 مئی کو جدہ روانہ ہوں گے، اور 28،29 مئی کو او آئی سی وزرائے خارجہ اجلاس میں شریک ہوں گے۔
خیال رہے کہ او آئی سی سربراہ اجلاس 30،31 مئی کو جدہ میں ہو رہا ہے۔
