لاہور : وزیراعظم عمران خان آج خیبرپختونخوا کے شہریوں کیلئے ہیلتھ کارڈ کا عملی آغاز کریں گے ، جس کے بعد شہری شناختی کارڈ کو بطور ہیلتھ کارڈ استعمال کرسکیں گے۔
تفصیلات کے مطابق معاون خصوصی ڈاکٹر شہباز گل نے سماجی رابطے کی ویب سائٹ ٹوئٹر پر اپنے پیغام میں کہا کہ وزیراعظم آج کےپی کے شہریوں کیلئے ہیلتھ کارڈ کاعملی آغاز کریں گے ، جس کے بعد سوات کے شہری شناختی کارڈ کوبطورہیلتھ کارڈ آج سے استعمال کرسکیں گے۔
ڈاکٹر شہباز گل کا کہنا تھا وزیراعظم عمران خان سوات میں بڑےاسپتال کا بھی افتتاح کریں گے۔
وزیراعظم عمران خان آج خیبر پختونخواہ کے تمام شہریوں کو ہیلتھ کارڈ دینے کا عملی آغاز کریں گے۔ پہلے مرحلے میں پوری مالاکنڈ ڈویژن سوات کے شہریوں کے قومی شناختی کارڈ کو ہیلتھ کارڈ کے طور پر آج سے استعمال کیا جا سکے گا۔وزیراعظم سوات میں ایک بڑے ہسپتال کا بھی افتتاح کریں گے۔
— Dr. Shahbaz GiLL (@SHABAZGIL) November 6, 2020
خیال رہے وزیراعظم عمران خان سوات کے گراسی گراونڈ میں جلسے سے خطاب کریں گے، عمران خان کے دورے کے دوران سوات سمیت ملاکنڈ ڈویژن کیلیے بڑا پیکیج متوقع ہے۔
صحت سہولت پروگرام کے تحت کن ہسپتالوں میں علاج کی سہولت حاصل کی جاسکتی ہے؟
ہسپتالوں کا باقائدہ انتخاب کیا جاتا ہے اور صرف ان ہی ہسپتالوں میں صحت کی سہولت حاصل کی جاسکتی ہے۔ علاج کے لیے فہرست میں موجود قریبی ہسپتال کا انتخاب کریں (ٹول فری نمبر 0800-89898)#KPSehatPlus pic.twitter.com/zoll9cGtMn
— PTI (@PTIofficial) November 6, 2020
یاد رہے خیبرپختونخوا کے عوام کو ہیلتھ انشورنس کارڈ کی فراہمی پر وزیراعظم عمران خان نے کے پی حکومت کو ہیلتھ کارڈ کے اجرا پر مبارکباد دیتے ہوئے کہا تھا یہ پاکستان کوریاست مدینہ کی طرزپر فلاحی ریاست بنانےکی جانب بڑاقدم ہے۔
دوسری جانب وفاقی وزیرمراد سعید نے اپنے پیغام میں کہا تھا شکریہ عمران خان، کےپی کےبڑے سرکاری اورنجی اسپتالوں میں مفت سہولتیں ملیں گی، صوبے کی سو فیصد آبادی کومفت اور بہترین علاج کی سہولت میسرہوگی، ہر شہری کو دس لاکھ روپےکی ہیلتھ انشورنس حاصل ہوگی۔
