اسلام آباد : وزیراعظم عمران خان نے کامیاب جوان پروگرام میں اب تک کی پیش رفت پر اطمینان کا اظہار کرتے ہوئے پروگرام میں پیش رفت پر ماہانہ بریفنگ لینے کا فیصلہ کیا اور کہا نوجوانوں کوہروہ سہولت دیں گے، جس سے روزگار کے مواقع پیدا ہوں۔
تفصیلات کے مطابق وزیراعظم عمران خان سے معاون خصوصی عثمان ڈار اور مشیر خزانہ حفیظ شیخ کی ملاقات ہوئی، ملاقات میں وزیراعظم کو کامیاب جوان پروگرام کے تازہ ترین اعداد و شمار پر بریفنگ دی گئی اور پروگرام کےتحت نوجوانوان میں رقم کی تقسیم کا عمل تیز کرنے پر مشاورت ہوئی۔
بریفنگ میں بتایا گیا کہ چند دنوں میں 30ہزارنوجوانوں نے رقم کے حصول کیلئے درخواستیں دیں ، نوجوانوں کی سہولت کیلئے 21 بینک رقم کی تقسیم کا عمل مکمل کریں گے ،اب تک 1 ارب روپے کی رقم نوجوانوں میں تقسیم کی جا چکی ہے، مزید53ارب روپے سے زائد رقم کی درخواستیں موصول ہوئی ہیں۔
وزیراعظم عمران خان نے کہا رقم کی تقسیم کا عمل مزید تیز اور شفاف انداز میں مکمل کیا جائے، کورونا کےمعیشت پر منفی اثرات ختم کرنے کیلئےیہ پروگرام ضروری ہے، معیشت اوپر اٹھانے کےلئے نوجوانوں کو اسٹیک ہولڈر بنانا ہو گا۔
عمران خان کا کہنا تھا کہ نوجوانوں کو ہر وہ سہولت دیں گے، جس سےروزگار کے مواقع پیدا ہوں، پروگرام کے دوران رقم کی تقسیم کے عمل پر مکمل نظر رکھیں ، شفافیت اورمیرٹ پرکسی سطح پربھی سمجھوتہ نہیں ہونا چاہیے، کامیاب جوان پروگرام کی خود مانیٹرنگ کر رہا ہوں۔
وزیراعظم نے پروگرام میں پیش رفت پر ماہانہ بریفنگ لینے کا بھی فیصلہ کرتے ہوئے معاون خصوصی عثمان ڈار کو ہر ماہ بعد جائزہ رپورٹ پیش کرنے کی ہدایت کردی۔
معاون خصوصی عثمان ڈار نے کہا کامیاب جوان پروگرام سے10لاکھ نوجوانوں کوروزگار ملے گا، روزگار کی فراہمی کیلئے پہلے کسی حکومت نے سنجیدہ کوشش نہیں کی۔
کامیاب جوان پروگرام کا دائرہ کار پہلے سے وسیع کر دیا گیا ہے، نوجوانوں کیلئےآسان شرائط پر رقم کے حصول کاشاندار موقع ہے، وزیراعظم عمران خان کا پروگرام میں اب تک کی پیش رفت پر اطمینان کا اظہار کیا۔
