اسلام آباد: وزیر اعظم عمران خان کا کہنا ہے کہ احساس پروگرام کا مقصد غربت کا خاتمہ، تعلیم، خوراک اور صحت کی سہولت فراہم کرنا ہے، سروے سے یوٹیلیٹی اسٹورز اور دیگر فلاحی اداروں کو مدد ملے گی۔
تفصیلات کے مطابق وزیر اعظم عمران خان کی زیر صدارت اجلاس منعقد ہوا جس میں معاون خصوصی ثانیہ نشتر، چیئرمین نادرا اور بی آئی ایس پی کے حکام شریک ہوئے۔
اجلاس میں وزیر اعظم کو نیشنل سوشیو اکنامک رجسٹری پروگرام پر بریفنگ دی گئی۔ معاون خصوصی ثانیہ نشتر نے بریفنگ میں بتایا کہ بی آئی ایس پی نے 2011 میں پہلا سروے کیا تھا، بریفنگ کا مقصد ضرورت مند لوگوں کی نشاندہی تھا۔
بریفنگ میں بتایا گیا کہ نادرا کی مدد سے نیا سروے 2020 میں مکمل ہوجائے گا۔ مختلف این جی اوز کے تعاون سے ڈیٹا اکٹھا کر رہے ہیں۔ ڈیٹا اکٹھے کر کے اس کی تصدیق بھی کروائی جائے گی۔
ثانیہ نشتر نے بتایا کہ مرکزی کنٹرول روم بھی بنا دیا گیا ہے، پارلیمنٹرینز اپنے حلقوں کا جائزہ کنٹرول روم سے لے سکیں گے۔
انہوں نے کہا کہ احساس پروگرام سے استفادے کے لیے سیلف رجسٹریشن ڈرائیو شروع کی جائے گی۔
وزیر اعظم عمران خان کا کہنا تھا کہ احساس پروگرام موجودہ حکومت کا فلیگ شپ پروگرام ہے۔ پروگرام کا مقصد غربت کا خاتمہ، تعلیم، خوراک اور صحت کی سہولت فراہم کرنا ہے۔
انہوں نے کہا کہ مقامی انتظامیہ اور حکومتوں سے مل کر پوری آبادی کا سروے کیا جائے۔ سروے ایک قومی سطح کی سرگرمی ہے۔ سروے سے یوٹیلیٹی اسٹورز اور دیگر فلاحی اداروں کو مدد ملے گی۔
