اسلام آباد: وزیر اعظم عمران خان کو کلین اینڈ گرین پاکستان منصوبے پر بریفنگ دی گئی، وزیر اعظم کا کہنا تھا کہ ماحولیات کو درپیش چیلنجز سے نمٹنے کے لیے فوری اقدامات کیے جائیں۔
تفصیلات کے مطابق وزیر اعظم عمران خان کی زیر صدارت کلین اینڈ گرین پاکستان منصوبے پر بریفنگ اجلاس ہوا، مشیر برائے ماحولیاتی تبدیلی ملک امین اسلم نے وزیر اعظم کو بریفنگ دی۔
وزیر اعظم کو بتایا گیا کہ کلین اینڈ گرین منصوبے میں 10 ارب درخت لگائے جائیں گے۔ وزیر اعظم کو پلاسٹک بیگ کے استعمال پر پابندی، الیکٹرک وہیکلز پالیسی، گرین بلڈنگز سے متعلق قواعد اور ماحولیاتی تحفظ کے اقدامات پر بریفنگ دی گئی۔
بریفنگ میں بتایا گیا کہ 10 ارب درخت لگانے کے لیے صوبائی سطح پر منصوبہ بندی مکمل کرلی گئی۔ پلاسٹک بیگ پر پابندی کے آغاز میں ہی اچھے تنائج ملے ہیں، الیکٹرک وہیکلز کے ضمن میں پالیسی مرتب کرلی گئی ہے۔
بریفنگ کے مطابق کلین اینڈ گرین پاکستان انڈیکس منصوبے کا آغاز ستمبر میں کیا جائے گا، پہلے مرحلے میں پنجاب کے 12 اور پختنوخواہ کے 7 شہروں میں منصوبہ شروع ہوگا۔
مشیر ماحولیات کی جانب سے وزیر اعظم کو کل لاہور میں شجر کاری مہم پر بھی بریفنگ دی گئی، مشیر ماحولیات کے مطابق شجر کاری مہم میں 3 کروڑ پودے لگائے جائیں گے۔
وزیر اعظم کا کہنا تھا کہ ماحولیات کو درپیش چیلنجز سے نمٹنے کے لیے اقدامات کیے جائیں، پلاسٹک بیگ پر پابندی مہم میں عوام کا مثبت ردعمل نہایت حوصلہ افزا ہے، مہم کو کامیاب بنانے کے لیے طلبہ کی شرکت پر خصوصی توجہ دی جائے۔
انہوں نے مزید کہا کہ ماحولیات کے تحفظ کے حوالے سے دارالحکومت اسلام آباد کو ماڈل سٹی بنایا جائے۔
