اسلام آباد: وزیراعظم عمران خان کا کہنا ہے کہ پاکستان مخالف پروپیگنڈا کرنے والے اداروں کو بے نقاب کیا جائے، بیرونی عناصر سے پہلے پاکستان میں بیٹھے پروپیگنڈا کرنے والے عناصر کو روکنا ہوگا۔
اے آر وائی نیوز کی رپورٹ کے مطابق وزیراعظم ہاؤس میں پاکستان مخالف قوتوں کی ہائبرڈ وار سے متعلق اجلاس ہوا جس میں پاکستان کی ساکھ خراب کرنے والی این جی اوز ، اداروں کی سرگرمیوں سے متعلق بریفنگ دی گئی۔
وزیراعظم کو بتایا گیا کہ اسلامو فوبیا، دہشت گردی، انسانی حقوق کی آڑ میں پاکستان کے خلاف کوششیں جاری ہیں، پاکستان مخالف قوتوں کی ایما پر این جی اوز فوج مخالف پروپیگنڈے میں سرگرم ہیں۔
عمران خان کو بریفنگ دی گئی کہ خواتین، اقلیتوں کے حقوق کے ایشوز پر این جی اوز ، ادارے پروپیگنڈے میں مصروف ہیں، ذرائع کے مطابق وزیراعظم کو کچھ اداروں ، این جی اوز کی فنڈنگ کے ثبوت بھی دکھائے گئے۔
مزید پڑھیں: ہندو فاشسٹ ایجنڈے سے علاقائی امن کو خطرات لاحق ہیں، وزیراعظم
ذرائع کا کہنا ہے کہ وزیراعظم سے غیرملکی فنڈنگ لینے والے اداروں، این جی اوز کی نشاندہی کرکے کارروائی کی سفارش کی گئی۔
وزیراعظم نے غیرملکی فنڈنگ سے پروپیگنڈا کرنے والوں کے خلاف 48 گھنٹے میں ایکشن کا حکم دیا، عمران خان نے ہدایت دی کہ ایسی این جی اوز ، اداروں کی رجسٹریشن منسوخ کی جائے۔
عمران خان نے کہا کہ ہم نے اپنے ملک کو ٹھیک کرنا ہے دشمن عناصر سے پاک کرنا ہے، پروپیگنڈا کرنے والے اداروں کی رجسٹریشن کی درخواست منظور نہ کی جائے۔
