اسلام آباد :بھارتی فضائیہ کی ایل اوسی کی خلاف ورزی پر وزیراعظم عمران خان نے اہم اجلاس طلب کرلیا، جس میں موجودہ صورتحال سے متعلق وزیراعظم کو مکمل بریفنگ دی جائے گی۔
تفصیلات کے مطابق بھارتی دراندازی پر وزیراعظم عمران خان نے اجلاس طلب کرلیا، اجلاس میں وزیر خارجہ شاہ محمود قریشی ، وزیر دفاع پرویز خٹک سمیت اعلی حکام شرکت کریں گے۔
اجلاس میں بھارتی دراندازی کی بعد کی صورتحال پر جائزہ لیا جائے گا اور وزیراعظم عمران خان کو تازہ ترین صورتحال پر بریفنگ دی جائے گی۔
وزیرخارجہ شاہ محمودقریشی نے پالیسی بیان میں کہا بھارت نے ایل او سی کی خلاف ورزی کی، پاکستان مناسب جواب کا حق محفوظ رکھتاہے، وزیراعظم عمران خان نے لائن آف کنٹرول کی حالیہ صورتحال پر اجلاس بلایا ہے۔
اس سے قبل وزیرخارجہ نے کہا تھا کہ پاکستان پر خطرات کے بادل منڈلا رہے ہیں، پاکستان کے چپے چپے کا دفاع کرنے کی صلاحیت رکھتے ہیں، پاکستانی افواج ملک کے دفاع کے لیے تیار ہے، بھارت انتخابات کے خاطر خطے کا امن تباہ کرنے پر تلا ہے۔
یاد رہے بھارتی ایئرفورس کی جانب سے لائن آف کنٹرول کی خلاف ورزی کی گئی ، پاک فضائیہ کی بروقت ردعمل کے بعد بھارتی طیارے فرار ہوگئے۔
مزید پڑھیں : لائن آف کنٹرول کی خلاف ورزی، پاک فضائیہ کا بھرپور جواب، بھارتی طیارے بھاگ گئے
ڈی جی آئی ایس پی آر میجرجنرل آصف غفور کا کہنا تھا کہ بھارتی طیاروں نے مظفرآباد سیکٹر سے دراندازی کی کوشش کی اور مظفر آباد سیکٹر میں تین سے چارمیل اندر آئے، بھارتی طیاروں نے جلد بازی میں اپنا پے لوڈ کھلے علاقے میں گرایا، تاہم پے لوڈ گرنے سے کوئی جانی یا مالی نقصان نہیں ہوا۔
آئی ایس پی آرنے بھارتی طیاروں کی جانب سےجلدبازی میں پھینکےگئے پےلوڈکی تصاویرجاری کیں ہیں۔
واضح رہے گذشتہ ہفتے مقبوضہ کشمیر کے ضلع پلوامہ میں کار بم حملے میں42 بھارتی فوجی ہلاک اور متعدد زخمی ہوئے تھے، حملے کے فوری بعد بھارت نے پاکستان پر الزام تراشی کا سلسلہ شروع کردیا تھا۔
بعد ازاں وزیراعظم عمران خان نے بھارت کو پیشکش کرتے ہوئے کہاتھا کہ بھارت کے پاس پلواما حملے کے ثبوت ہے تو پیش کرے کارروائی کریں گے اور واضح کیا بھارت نے پاکستان پرحملہ کیاتوجواب دینےکاسوچیں گےنہیں بلکہ جواب دیں گے۔
ان کا کہنا تھا کہ بھارت کوایک مرتبہ پھرکہتاہوں کھلےذہن کےساتھ آگےبڑھیں، پاکستان دہشت گردی سےسب سےزیادہ متاثرملک ہے، افغانستان میں کئی سال جنگ چلی آج وہاں بھی مذاکرات ہورہےہیں، جنگ کسی بھی مسئلےکاحل نہیں آخرمیں مذاکرات ہی ہوتےہیں۔
