اسلام آباد : وزیراعظم عمران خان نے کورونا کے بڑھتے کیسز اور حالیہ صورت حال کے پیش نظر قومی رابطہ کمیٹی کااجلاس آج شام طلب کرلیا ، جس میں اہم فیصلے متوقع ہے جبکہ وزیراعظم قومی رابطہ کمیٹی اجلاس کے بعداظہار خیال بھی کریں گے۔
تفصیلات کے مطابق وزیراعظم عمران خان کی زیر صدارت قومی رابطہ کمیٹی کا اہم اجلاس آج ہوگا ، جس میں کورونا کے بڑھتے کیسز اور حالیہ صورت حال کے پیش نظر اہم فیصلے متوقع ہے۔
ذرائع کا کہنا ہے کہ وزیراعظم قومی رابطہ کمیٹی اجلاس کے بعد ملک میں کورونا کی صورتحال پر اظہار خیال کریں گے اور عوام سے ماسک کے استعمال اور ایس او پیز پر عملدرآمد کی اپیل کریں گے۔
گذشتہ روز وزیراعظم عمران خان نے کورونا کا پھیلاؤ روکنے کیلئے ممکنہ اقدامات اٹھانے کی ہدایت کرتے ہوئے قومی رابطہ کمیٹی برائے کورونا کا مشاورتی اجلاس بلانے کا فیصلہ کیا تھا۔
اس موقع پر وزیراعظم نے کہا تھا کہ کورونا وبا کے پہلے مرحلے میں قابل تقلید حکمت عملی اپنائی، بروقت فیصلوں سے وبا پر قابو پایا جس کی دنیا معترف ہے، کورونا وبا کے دوسرے مرحلے میں بھی سنجیدگی دکھانا ہوگی، ہمیں توازن اور احتیاط کا دامن ہرگز نہیں چھوڑنا چاہیے۔
یاد رہے وزیراعظم عمران خان نے ملک میں مکمل لاک ڈاؤن کا عندیہ دیتے ہوئے کہا تھا کہ پاکستان میں کرونا کی دوسری لہر تشویشناک ہے، گزشتہ 15دن میں وینٹی لیٹرز پر کرونا مریضوں کی تعداد میں اضافہ ہوا ہے۔
