اسلام آباد : وزیر اعظم عمران خان نے معصوم بچی مروہ اور خاتون سے زیادتی کے واقعات کی رپورٹ طلب کرلی اور ملوث افراد کو جلد از جلد قانون کی گرفت میں لانے اور قرار واقعی سزا دلوانے کا حکم جاری کردیا۔
تفصیلات کے مطابق وزیر اعظم عمران خان نے معصوم بچی مروہ اور خاتون سے زیادتی کے مختلف واقعات کا سخت نوٹس لیتے ہوئے متعلقہ آئی جیز سے واقعات کی رپورٹ طلب کرلی۔
وزیراعظم نے کہا کہ خواتین کا تحفظ حکومت کی اولین ترجیح اور ذمہ داری ہے، کسی مہذب معاشرے میں ایسی درندگی اور حیوانیت کی اجازت نہیں دی جا سکتی، ایسے واقعات ہماری سماجی اقدار کے منافی اور سوسائٹی پر بدنما داغ ہیں۔
متعلقہ آئی جی صاحبان سے ان واقعات کی رپورٹ طلب
واقعے میں ملوث افراد کو جلد از جلد قانون کی گرفت میں لانے اور قرار واقعی سزا دلوانے کا حکم
وزیر اعظم کی معصوم بچوں اور خواتین سے زیادتی کے واقعات کے تدارک کے حوالے سے قوانین کو مزید موثر بنانے کے لئے اقدامات کرنے کی ہدایت
— Prime Minister’s Office, Pakistan (@PakPMO) September 10, 2020
وزیراعظم نے واقعے میں ملوث افراد کو جلد از جلد قانون کی گرفت میں لانے اور قرار واقعی سزا دلوانے کا حکم جاری کردیا۔
عمران خان نے معصوم بچوں اور خواتین سے زیادتی کے واقعات کے تدارک کے حوالے سے قوانین کو مزید موثر بنانے کے لئے اقدامات کرنے کی ہدایات بھی جاری کیں۔
یاد رہے اس سے قبل وفاقی وزیر فیصل واوڈا نے وزیراعظم عمران خان سے ملاقات میں ننھی مروا اور گزشتہ رات خاتون کے ساتھ پیش آنے والا واقعہ اٹھایا، جس پر وزیراعظم نے سخت برہمی کا اظہار کرتے ہوئے کہا تھا کہ مہذب معاشروں میں ایسے واقعات شرمناک ہیں، انسانی حقوق کے تحفظ کے لیے ہر ممکن اقدامات کیے جائیں گے۔
