The news is by your side.

Advertisement

وزیر اعظم کی زیر صدارت وفاقی کابینہ کا اجلاس کل ہوگا

اسلام آباد: وزیر اعظم عمران خان کی زیر صدارت وفاقی کابینہ کا اجلاس کل ہوگا جس میں متعدد اہم امور زیر غور آئیں گے۔

تفصیلات کے مطابق وزیر اعظم عمران خان نے وفاقی کابینہ کا اجلاس کل طلب کرلیا۔ وفاقی کابینہ کے اجلاس کا 10 نکاتی ایجنڈا جاری کردیا گیا۔

کابینہ اجلاس میں ملکی سیاسی اور معاشی صورتحال کا جائزہ لیا جائے گا، کابینہ اقتصادی رابطہ کمیٹی کے فیصلوں کی توثیق کرے گی۔

اجلاس میں کابینہ کی خصوصی کمیٹی برائے نجکاری کے فیصلوں کی بھی توثیق ہوگی۔ آزاد جموں و کشمیر کے مالی سال 20-2019 کے پراپرٹی بجٹ کی منظوری بھی اجلاس کے ایجنڈے میں شامل ہے۔

اجلاس میں پاکستان اکادمی ادبیات کے چیئرمین کی تعیناتی کا معاملہ بھی زیر غور آئے گا جبکہ کابینہ کو مسابقتی کمیشن سے متعلق بریفنگ دی جائے گی۔

کابینہ کو یوٹیلٹی اسٹورز کارپوریشن سے متعلق تفصیلی بریف کیا جائے گا۔ اجلاس میں وفاقی دارالحکومت میں کمسن بچوں کی عدالتوں کے قیام کی منظوری بھی شامل ہے۔

خواتین پراپرٹی حقوق آرڈیننس 2019 کے نفاذ میں ترمیم کے معاملے پر بھی اجلاس میں غور ہوگا۔

اس سے قبل 26 نومبر کو ہونے والے وفاقی کابینہ کے اجلاس میں بھارت سے کیڑے مار دوا اور پولیو مہم کے لیے فنگر مارکر کی درآمد کی تجویز دی گئی جسے کابینہ نے مسترد کردیا۔

گزشتہ اجلاس میں کابینہ نے عالمی ادارہ خوراک کو کراچی سے کابل گاڑیوں کے اسپیئر پارٹس لے جانے کی اجازت دی تھی۔ اجلاس میں پی ٹی وی کے ایم ڈی عمار منظور کی تعیناتی اور تنخواہ و مراعات کی منظوری بھی دی گئی تھی۔

Comments

یہ بھی پڑھیں