اسلام آباد : وزیراعظم عمران خان آج سانحہ نوشکی کے دوران شہید ہونے والے جوانوں کی یادگار پر پھول چڑھائیں گے اور ایف سی کے جوانوں سے خطاب کریں گے۔
تفصیلات کے مطابق وزیراعظم پاکستان عمران خان آج ایک روزہ دورے پر کوئٹہ پہنچیں گے ، جہاں ان کی اہم ملاقاتیں ہونگیں ، نوشکی کا بھی دورہ کریں گے
سرکاری ذرائع کا کہنا ہے کہ وزیراعظم ایک روزہ دورے کے دوران گورنر بلوچستان،وزیراعلی بلوچستان وفاقی و صوبائی وزراء کے ہمراہ نوشکی جائیں گے۔
جہاں وہ سانحہ نوشکی کے دوران شہید ہونے والے جوانوں کی یادگار پر پھول چڑھائیں گے اور ایف سی کے جوانوں سے خطاب کریں گے۔
اس موقع پر وزیراعظم کو نوشکی کیمپ پر دہشت گردوں کے حملے کے حوالے سے بریفنگ بھی دی جائے، وزیر داخلہ شیخ رشید اور دیگر وزراء بھی عمران خان کے ہمراہ ہوں گے۔
دورے کے دوران وزیراعظم گورنر و وزیراعلیٰ بلوچستان سے ملاقاتیں کریں گے جبکہ کوئٹہ میں اہم اجلاس کی صدارت بھی کریں گے ، اجلاس کے دوران وزیراعظم کو امن و امان سے متعلق بریفنگ دی جائے گی۔
وزیراعظم کی زیر صدارت سی پیک ترقیاتی منصوبوں پر پیشرفت سے متعلق اجلاس بھی منعقد ہوگا۔
