The news is by your side.

Advertisement

وزیر اعظم عمران خان آج ایک روزہ دورے پر لاہور آئیں گے

لاہور: وزیر اعظم عمران خان آج ایک روزہ دورے پر لاہور آئیں گے، وزیر اعظم ایوان اقبال میں انصاف ڈاکٹرز فورم سے خطاب کریں گے۔

اے آر وائی نیوز کے مطابق ایک روزہ دورہ لاہور کے موقع پر وزیر اعظم عمران خان وزیر اعلیٰ اورگورنر پنجاب سے بھی ملاقاتیں کریں گے، جب کہ ان کا دن لاہور میں آج مصروف گزرے گا۔

وزیر اعظم عمران خان گورنر ہاؤس میں ہیلتھ کارڈز سے متعلق ایک اجلاس کی صدارت بھی کریں گے۔

یاد رہے کہ جمعے کو لاہور میں صوبائی وزیر صحت یاسمین راشد نے معاون خصوصی وزیر اعظم ڈاکٹر فیصل سلطان سے ملاقات کی تھی، اس دوران یاسمین راشد نے بتایا تھا کہ پنجاب میں صحت انصاف کارڈ کا دائرہ کار وسیع کیا جا رہا ہے، ہیلتھ کوریج سے 80 لاکھ خاندانوں کو مفت علاج کی سہولت ملے گی، پنجاب میں نرسنگ اسکولوں کو بھی اپ گریڈ کر کے کالج کا درجہ دیا جائے گا۔

دو ہفتے قبل سرکاری اسکولوں میں زیر تعلیم طلبہ کو بھی صحت کارڈ سے متعلق فیصلہ ہوا تھا، اسکول ایجوکیشن محکمے نے محکمہ صحت کے تعاون سے طلبہ کو ہیلتھ کارڈ جاری کرنے کا فیصلہ کیا تھا۔ فیصلے کے مطابق صحت کارڈ بننے کے بعد طلبہ لاہور کے 25 اسپتالوں سے مفت علاج کرا سکیں گے، صحت کارڈ بنانے کے لیے تمام طلبہ کو اپنے والدین کے آئی کارڈ کی نقول جمع کرانا ہوں گی۔

Comments

یہ بھی پڑھیں