مظفرآباد: آزاد کشمیر الیکشن میں سیاسی گہما گہمی جاری، وزیراعظم عمران خان آج یونیورسٹی گراؤنڈ میں جلسہ عام سے خطاب کرینگے۔
تفصیلات کے مطابق گذشتہ روز بھمبر اور میرپور میں کامیاب جلسوں کے بعد آج وزیراعظم عمران خان یونیورسٹی گراؤنڈ مظفرآباد میں انتخابی جلسے سے خطاب کریں گے۔
اطلاعات کے مطابق وزیراعظم کے ہمراہ شاہ محمود قریشی، شیخ رشید اوردیگررہنما بھی مظفر آباد روانہ ہونگے۔
باغ،بھمبر اور میرپور میں کامیاب جلسہ کرنے کے بعد نوجوانوں کے دلوں کی دھڑکن،سفیر کشمیر وزیراعظم عمران خان آج دارلحکومت مظفرآباد تشریف لا رہے ہیں،جہاں وہ بڑے عوامی اجتماع سے تاریخ ساز خطاب کریں گے۔#کشمیر_کا_کپتان_عمران_خان pic.twitter.com/OmilfZp5ie
— PTI Azad Kashmir (@PTIAJK_Official) July 19, 2021
گذشتہ روز وزیراعظم نے بھمبر اور میرپور میں کامیاب جلسے کئے، وزیراعظم عمران خان نے بھمبر میں عوامی اجتماع سے خطاب کرتے ہوئے کہا کہ ملک میں قانون کی حکمرانی کی جنگ لڑ رہے ہیں،قوم حق اور سچ کے نظریئے کے ساتھ بنتی ہے، مقبوضہ کشمیر کے عوام بھارتی مظالم کیخلاف کھڑے ہیں ہمیں ان پر فخر ہے۔
وزیراعظم کا کہنا تھا کہ ہم ظلم اورپرانے نظام کےخلاف جہادکر رہےہیں، عوام کی طاقت سے مافیا کو شکست دوں گا اور نیاپاکستان بناکر دکھاؤں گا، کپتان کو مقابلہ کرنا آتا ہے، آنے والے دنوں میں مقبوضہ کشمیر کو آزاد دیکھیں گے‘۔
وزیراعظم نے جلسہ کے شرکاء سے خطاب کرتے ہوئے کہا کہ کرونا ختم نہیں ہوا، اس لئے سب ماسک لازمی پہنیں، کیونکہ صرف ماسک پہن کر ہی کرونا سے بچا جا سکتا ہے۔
واضح رہے کہ پچیس جولائی کو آزاد کشمیر میں عام انتخابات کے لئے پولنگ ہونے جارہی ہے، پاکستان پیپلز پارٹی، پاکستان مسلم لیگ(ن) کا پی ٹی آئی سے کانٹے دار مقابلے کی توقع ہے۔
