لاہور: وزیر اعظم شاہد خاقان عباسی کا کہنا ہے کہ عدالتوں میں عوامی نمائندوں کو چور، ڈاکو، مافیا کہنا قبول نہیں۔ وزیر اعظم نواز شریف کی سیاست کا فیصلہ لودھراں میں ہوگیا۔
تفصیلات کے مطابق وزیر اعظم شاہد خاقان عباسی نے صوبہ پنجاب کے شہر حافظ آباد میں قومی صحت کارڈ کا اجرا کر دیا۔ وزیر اعظم نے مستحق افراد میں صحت کارڈ تقسیم بھی کیے۔
اس موقع پر وزیر اعظم نے کہا کہ آج حافظ آباد آ کر بہت خوشی ہورہی ہے۔ جس علاقے کو اچھے نمائندے ملیں وہاں ترقی ہوتی ہے۔ عوامی نمائندگی آسان کام نہیں۔
وزیر اعظم کا کہنا تھا کہ موجودہ حکومت نے ملک سے توانائی بحران ختم کیا۔ ملک میں اس وقت گیس وافر مقدار میں موجود ہے۔ اخلاقیات اور ملکی مسائل حل کرنے کی صلاحیت والوں کو منتخب ہونا چاہیئے۔ موجودہ حکومت نے 10 ہزار 4 میگا واٹ بجلی نظام میں شامل کی۔
انہوں نے کہا کہ گزشتہ حکومتوں نے دعوے تو بہت کیے لیکن کام نہ کیا۔ گزشتہ 4 سال میں جتنے کام ہوئے ان کی مثال نہیں ملتی۔ معیاری طبی سہولتیں غربا تک پہنچنانا عوام کا مقصد تھا۔
وزیر اعظم کا کہنا تھا کہ پنجاب حکومت نے صحت کے معاملے پر بے مثال کام کیا۔ صحت کارڈ کو پھیلایا جا رہا ہے تاکہ ہر ایک مستفید ہوں۔ عوامی نمائندگی کا حق صرف عوامی تائید لانے والوں کو ہے۔ جو فیصلے پارلیمنٹ کرے وہ بھی قبول ہونے چاہئیں۔
انہوں نے کہا کہ ہر ادارہ اپنی آئینی حدود میں رہ کر کام کرے۔ احتساب کسی ادارے کا نہیں صرف سیاستدانوں کا ہوتا ہے۔ ذاتی انا، پسند ناپسند کو ایک طرف کردیں، ملکی مفاد کی بات کریں۔
وزیر اعظم نے مزید کہا کہ عوامی نمائندوں کو غلط ناموں سے پکارنا درست نہیں۔ ملک کو آگے لے جانے کے لیے ادارے ایک دوسرے کی عزت کریں۔ ہم اداروں کا احترام کرتے ہیں، عوامی فیصلے عوام پر چھوڑ دینے چاہئیں۔
خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
