اسلام آباد: وزیر اعظم عمران خان نے راولپنڈی میانوالی ٹرین کا افتتاح کردیا۔ اس موقع پر ان کا کہنا تھا کہ ساری سہولتیں امیروں کے لیے ہوتی ہیں لیکن اب ایسا نہیں ہوگا۔
تفصیلات کے مطابق وزیر اعظم عمران خان نے راولپنڈی میانوالی ٹرین کا افتتاح کردیا۔ اس موقع پر تقریب سے خطاب میں ان کا کہنا تھا کہ انگریزوں سے آزادی حاصل کرلی لیکن مائنڈ سیٹ کو نہیں چھوڑا، حکمرانوں نے صرف اپنا اور خاندان کے بارے میں سوچا۔
وزیر اعظم کا کہنا تھا کہ ملک میں مہنگائی کی گئی، اسپتال میں غریب علاج کے لیے ترس گئے۔ ریلوے غریبوں کی سواری ہے۔ انگریز 11 ہزار کلو میٹر ریل ٹریک چھوڑ کر گئے تھے۔ ہمارے حکمرانوں نے اب تک صرف 600 کلو میٹر ٹریک بنایا۔
انہوں نے کہا کہ یہ پہلی حکومت ہوگی جو نیچے سے لوگوں کو اوپر اٹھائے گی۔ ریلوے کی سرگرمیوں میں واضح اضافہ نظر آرہا ہے۔ ساری سہولتیں امیروں کے لیے ہوتی ہیں لیکن اب ایسا نہیں ہوگا۔ حکومت عام آدمی کی بہتری کے لیے ہر قدم اٹھا رہی ہے۔
وزیر اعظم کا کہنا تھا کہ کراچی سے پشاور تک ایم ایل ون کی تعمیر پر خوشی ہے، ضعیف افراد کے لیے سفری سہولت سے بھی متاثر ہوا ہے، ہم اپنے بچوں کا مستقبل اپنے ہاتھوں سے تباہ کر رہے ہیں۔
وزیر اعظم نے مزید کہا کہ اسلام آباد میں تجاوزات کے خلاف کامیاب آپریشن جاری ہے۔ اسلام آباد میں اب تک 100 ارب کی زمین واگزار کروا لی ہے۔ ملک بھر میں تجاوزات کے خلاف آپریشن کیے جائیں گے۔
انہوں نے کہا کہ ہم نے بڑے بڑے قبضہ گروپس پر ہاتھ ڈالنا ہے، بڑے بڑے قبضہ گروپس سے زمین لے کر پروڈکٹ کریں گے۔ سرکاری زمین پر غریب رہائش پذیر لوگوں کو کچھ نہیں کہیں گے۔
انہوں نے کہا کہ مری کے گورنر ہاؤس کی تزئین و آرائش پر گزشتہ سال 60 کروڑ خرچ ہوا۔ وزیر اعظم ہاؤس کو بہترین یونیورسٹی بنائیں گے۔ کراچی میں زمین واگزار کروا لیں تو ریلوے کا قرضہ اتر جائے گا۔ عام آدمی کی بہتری کے لیے کام کریں گے، عوام کا پیسہ عوام پر خرچ ہوگا۔
ان کا کہنا تھا کہ خوش قسمت ہیں پاکستان کے چین کے ساتھ بہترین تعلقات ہیں، نومبر میں چین جا رہا ہوں، شیخ رشید کو بھی ساتھ لے جاؤں گا۔ ’چین کی ٹرینیں دنیا بھر میں چل رہی ہیں‘۔
تقریب سے وفاقی وزیر ریلوے شیخ رشید نے بھی خطاب کیا۔
اپنے خطاب میں ان کا کہنا تھا کہ پاکستان کی 65 فیصد آبادی ریلوے لائن کے دونوں اطراف آباد ہے، ایک سال میں ریلوے کا خسارہ کم کریں گے۔ گوادر کو ریلوے ڈویژن بنا دیا ہے۔
انہوں نے کہا کہ ڈیم فنڈز کے لیے ریلوے کے کرائے میں ایک سے 10 روپے تک اضافہ کیا، وزیر اعظم کی تقریب میں شرکت سے غریب کی سواری کو عزت ملی۔ فریٹ ٹرین اور برانچ لائنوں میں اضافہ کریں گے۔ ٹرینوں میں فری وائی فائی اور جدید ٹرانسمیشن سسٹم لا رہے ہیں۔
انہوں نے کہا کہ 65 سال کے افراد کے لیے ٹکٹ آدھا، 75 سال والوں کا مفت کر دیا ہے، پہلے 100 دنوں میں سندھ کی عوام کو 2 نئی ٹرینوں کا تحفہ دیں گے۔
شیخ رشید نے مزید کہا کہ ٹرینوں میں فری وائی فائی اور جدید مانیٹرنگ سسٹم لا رہے ہیں، ایران تک 7 ٹرینیں چلائیں گے۔ ریلوے کے اربوں روپے کے پلانٹس استعمال میں لائیں گے۔
