کراچی: گورنر سندھ عمران اسماعیل نے کہا ہے کہ وزیراعظم کو اپنے ٹائیگرز پر فخر ہے، وقت آگیا ان ٹائیگرز کی صلاحیتوں سے فائدہ اٹھایا جائے۔
تفصیلات کے مطابق گورنر سندھ کی زیر صدارت گورنر ہاؤس میں ٹائیگر فورس سے متعلق اجلاس ہوا جس میں آفتاب صدیقی، عالمگیر خان اور دیگر نے ویڈیو لنک سے شرکت کی۔اراکین صوبائی اسمبلی فردوس شمیم نقوی اور حلیم عادل شیخ بھی اجلاس میں شریک تھے۔
اجلاس میں گورنر سندھ کو کرونا وائرس سمیت دیگر مسائل میں فورس کے اہم کردار پر تفصیلی بریفنگ دی گئی۔
اس موقع پر گورنر سندھ عمران اسماعیل کا کہنا تھا کہ وزیراعظم پاکستان کو اپنے ٹائیگرز پر فخر ہے،وقت آگیا ان ٹائیگرز کی صلاحیتوں سے فائدہ اٹھایا جائے۔
عمران اسماعیل نے کہا کہ ٹائیگرفورس میں شمولیت کے لیے رجسٹریشن جاری ہے،ٹائیگر فورس کو گورنر ہاؤس میں ڈیش بورڈ سے مانیٹر کیاجائے گا، ڈیش بورڈ سے ٹائیگر فورس کو تمام اضلاع میں متحرک کیا جائے گا۔
گورنر سندھ کا مزید کہنا تھا کہ مارکیٹوں اورمساجد میں ایس او پیز کی پاسداری کرانا بھی ٹائیگر فورس کا کام ہے۔
