لندن : وزیر اعظم نواز شریف نے وطن واپسی کی تیاری شروع کردی، ڈاکٹروں نے انہیں سفر کرنیکی اجازت دیدی ہے۔
تفصیلات کے مطابق وزیراعظم نواز شریف کو ڈاکٹروں نے گرین سگنل دیدیا، جس کے بعد وزیراعظم نے لندن میں دل کے کامیاب آپریشن کے بعد وطن واپسی کی تیاری شروع کر دی ہے۔
وزیر اعظم کی نو جولائی کو وطن واپسی کا امکان ہے، ڈاکٹروں نے وزیرِاعظم کو سفر کی اجازت دیدی ہے، نواز شریف خصوصی طیارے کے ذریعے وطن پہنچیں گے۔
یاد رہے کہ وزیراعظم نواز شریف بائیس مئی کو دل کے بائی پاس آپریشن کیلئے لندن روانہ ہوئے تھے، جہاں ہارلے اسٹریٹ اسپتال میں ان کا آپریشن ہوا تھا، وزیراعظم کی علاج کی غرض سےلندن روانگی پرکافی چہ مگوئیاں بھی ہوئیں۔
خیال رہے کہ نواز شریف وطن پہنچیں گے تو انہیں پاناما لیکس پر تحقیقات، الیکش کمیشن میں نااہلی کے ریفرنسز سمیت دیگر سنجیدہ ایشوز کا سامنا ہوگا۔
