The news is by your side.

Advertisement

وزیر اعظم کا بڑا قدم، 40 لاکھ افراد کو غربت سے نکالنے کا کامیاب پاکستان منصوبہ

اسلام آباد: وزیر اعظم عمران خان نے کہا ہے کہ 40 لاکھ افراد کو غربت سے نکالنے کا کامیاب پاکستان منصوبہ لانچ کر رہے ہیں۔

تفصیلات کے مطابق آج بدھ کو وزیر اعظم عمران خان کی زیر صدارت حکومتی رہنماؤں کے اجلاس میں لوگوں کو کامیاب پاکستان منصوبے کی آگاہی دینے کے لیے مہم چلانے کا فیصلہ کیا گیا ہے، وزیر اعظم کا کہنا تھا کہ اس منصوبے کے تحت چالیس لاکھ افراد کو غربت سے نکالا جائے گا۔

اجلاس میں حکومت کی 3 سال کی کارکردگی رپورٹ پر تجاویز طلب کی گئیں، اور 18 اگست کو حکومت کی 3 سالہ کارکردگی رپورٹ جاری کرنے کا فیصلہ کیا گیا۔

اجلاس میں آزاد کشمیر الیکشن میں کامیابی پر وزیر اعظم کو مبارک باد پیش کی گئی، وزیر اعظم نے حکومتی رہنماؤں سے گفتگو میں کہا تحریک انصاف ملک کی سب سے بڑی جماعت بن چکی ہے، لیڈر شپ کا تقاضا ہے کہ آپ میں دباؤ برداشت کرنے کی صلاحیت ہو، افغانستان کے معاملے پر ہم پر بہت بڑا دباؤ آئے گا، لیکن ہم نے دباؤ میں آنے کی بجائے وہ فیصلے کرنے ہیں جو عوام کی بہتری کے ہوں۔

انھوں نے کہا پہلے مشکل فیصلے کرنے ہوتے ہیں اور پھر ان پر کھڑا ہونا ہوتا ہے، کرونا وبا کے دوران ہم نے مشکل فیصلے کیے جن کے بہتر نتائج آئے، انسان کوشش کر کے نا ممکن کو ممکن بنا سکتا ہے۔

وزیر اعظم کا کہنا تھا ہم نے ایک نظریے کی بنیاد پر سیاست کا آغاز کیا، ہم میں اور اپوزیشن میں نظریے کا فرق ہے، ہم نظریے پر کھڑے رہے تو کبھی ناکام نہیں ہوں گے۔

Comments

یہ بھی پڑھیں