مدینہ منورہ : وزیراعظم شہباز شریف نے مسجد نبویؐ میں روضہ رسول ﷺ پر حاضری دی اور وفد کے ساتھ ریاض الجنتہ میں نوافل ادا کیے۔
تفصیلات کے مطابق وزیراعظم محمد شہباز شریف نے دورہ سعودی عرب کے دوران مسجد نبویﷺ میں حاضری دی اور اپنے وفد کے ہمراہ روضہ رسولﷺ کی زیارت کی سعادت حاصل کی۔
اس موقع پر وزیراعظم اور ان کے وفد کے لیے خصوصی طور پر ریاض الجنتہ کے دروازے کھولے گئے۔
وزیراعظم نے وفد کے ہمراہ ریاض الجنتہ میں نوافل ادا کیے اور امت مسلمہ اور ملک و قوم کی ترقی و خوشحالی کیلئے خصوصی دعا کی۔
یاد رہے گزشتہ روز وزیراعظم نے سعودی ولی عہدشہزادہ محمد بن سلمان سے ملاقات کی تھی ، جس میں دفاعی اور سیکیورٹی تعاون مضبوط بنانے پر اتفاق کیا گیا۔
وزیراعظم کی سعودی وزیر سرمایہ کاری خالد الفالح اور جوائنٹ ٹاسک فورس برائے اقتصادی مصروفیات کے سربراہ محمد التویجری سے ملاقات بھی ہوئی، ملاقات میں اقتصادی تعاون کو مضبوط بنانے، پاکستان میں مزید سعودی سرمایہ کاری لانے اور اہم شعبوں میں مشترکہ اقدامات کو تیز کرنے پر تبادلہء خیال کیا گیا۔
سعودی وزیر خالد الفالح اور ٹاسک فورس کے سربراہ محمد التویجری نے پاکستان کے ساتھ اقتصادی تعلقات کو مزید گہرا کرنے میں سعودی عرب کی گہری دلچسپی کا اظہار کیا۔
