اسلام آباد: وزیر اعظم شہباز شریف نے حمزہ شہباز کے مفت بجلی کے اعلان کو خوش آئند قرار دے دیا۔
تفصیلات کے مطابق وزیر اعظم پاکستان شہباز شریف نے کہا ہے کہ وزیر اعلیٰ پنجاب کی ماہانہ 100 یونٹس تک استعمال پر بجلی کی مفت فراہمی خوش آئند ہے۔
انھوں نے ایک ٹویٹ میں کہا کہ غریب ترین طبقے کو مشکل معاشی حالات سے بچانا ہماری اولین ترجیح ہے، معاشی حالات بہتر ہوتے ہی ہم عوام کو مزید سہولتیں فراہم کریں گے۔
واضح رہے کہ گزشتہ روز وزیر اعلیٰ پنجاب حمزہ شہباز نے صوبے میں ضمنی انتخاب سے قبل بجلی پر ریلیف دیتے ہوئے گزشتہ 6 ماہ میں 100 یونٹ بجلی استعمال کرنے والوں کو مفت بجلی دینے کا اعلان کر دیا ہے۔
پہلے دن سےغریب ترین طبقے کو مشکل معاشی حالات کے اثر سےبچانا ہماری اولین ترجیح رہی ہے۔وزیر اعلٰی پنجاب کا ماہانہ 100 یونٹس تک استعمال کرنے والےخاندانوں کے لیے بجلی کی مفت فراہمی کا اعلان نہایت خوش آئند ہے۔معاشی حالات بہتر ہوتے ساتھ ہی ہم آپ کو مزیدسہولیات فراہم کریں گے، انشاءاللّہ
— Shehbaz Sharif (@CMShehbaz) July 5, 2022
حمزہ شہباز نے لاہور میں پریس کانفرنس کرتے ہوئے کہا سو یونٹ استعمال کرنے والے صارفین کو پنجاب حکومت نہ صرف مفت بجلی دے گی بلکہ انھیں ایک مدت کے اندر سولر پینل بھی دیا جائے گا۔
پنجاب میں ضمنی الیکشن سے قبل حمزہ شہباز کا بجلی پر ریلیف دینے کا اعلان
حمزہ شہباز نے کہا کہ ریلیف کا سلسلہ جو سستے آٹے، دوائیوں سے شروع ہوا، اب مفت بجلی تک آ پہنچا ہے، اگست میں 100 یونٹ تک بجلی استعمال کرنے والے گھریلو صارفین کے بل پنجاب حکومت ادا کرے گی، ہم چاہتے ہیں آنے والے سالوں میں ان غریبوں کو مفت بجلی ملے، مفت بجلی منصوبے کے لیے 100 ارب روپے رکھے ہیں، اس سے 90 لاکھ خاندان ایک سال کے اندر مستفید ہوں گے۔
