اسلام آباد : وزیراعظم شہباز شریف نے صحافی ارشد شریف کیساتھ پیش آئے واقعے پر حقائق قوم کے سامنے لانے کا اعلان کردیا۔
تفصیلات کے مطابق وزیراعظم شہباز شریف نے اپنے بیان میں کہا ہے کہ کل کینیا میں نامورصحافی ارشد شریف کیساتھ جو واقعہ ہوا وہ انتہائی قابل مذمت ہے ، پاکستان کے عوام ارشد شریف کی موت پر افسردہ ہیں ، اس واقعے کی جتنی مذمت کی جائے کم ہے۔
شہباز شریف کا کہنا تھا کہ سعودی عرب روانہ ہونےسے پہلے کینیا کے صدر سے خود بات کی ، کینیا کے صدر سے گزارش کی کہ تحقیقاتی رپورٹ فوراً بھجوائیں اور درخواست کی میت کی روانگی کیلئے کرداراداکریں۔
وزیراعظم نے بتایا کہ کینیا کے صدر نے اظہارہمدردی کی اورکہا اس معاملے پر ہر ممکن تعاون کریں گے۔
ان کا کہنا تھا کہ ارشد شریف کیساتھ پیش آنیوالے واقعے کی جوڈیشل کمیشن سے شفاف تحقیقات کرانےکافیصلہ کیا ہے ، جوڈیشل کمیشن کیلئے اسلام آباد ہائی کورٹ کو درخواست دیں گے کابینہ سےبھی توثیق کرائیں گے۔
شہباز شریف نے کہا کہ یہ واقعہ ہم سب کیلئے انتہائی قابل افسوس ہے اس کی شفاف تحقیقات ہوں گی اور ارشد شریف کیساتھ پیش واقعے پر حقائق قوم کے سامنے لائیں گے۔
