اسلام آباد : پی ٹی آئی فنڈنگ کیس کے فیصلے پر غور کے لیے وفاقی کابینہ کی بیٹھک آج لگے گی، الیکشن کمیشن کا فیصلہ کابینہ کے سامنے رکھا جائے گا۔
تفصیلات کے مطابق وزیر اعظم شہباز شریف کی زیر صدارت وفاقی کابینہ کا اجلاس آج 3 بجے ہوگا ، وفاقی کابینہ 8 نکاتی ایجنڈا پر غور کرے گی۔
اجلاس میں الیکشن کمیشن کا فیصلہ ارکان کے سامنے رکھا جائے گا، جس کے بعد پی ٹی آئی ممنوعہ فنڈنگ کیس کے فیصلے پر مشاورت سمیت قانونی کاروائی کے لئے فیصلے ہوں گے۔
کابینہ اجلاس میں وزیر قانون اور حکومتی قانونی ٹیم کابینہ کو الیکشن کمیشن فیصلہ پر بریفنگ دے گی ، وزارت قانون ،پارلیمانی امور کی رپورٹ پر مزید کارروائی کی جائے گی۔
عمران خان سمیت پی ٹی آئی رہنماوں کے نام ای سی ایل میں ڈالنے کی منظوری متوقع ہے جبکہ عمران خان کی نااہلی سےمتعلق سپریم کورٹ سے رجوع کے فیصلہ کا بھی امکان ہے۔
کابینہ اجلاس میں ملکی سیاسی صورتحال پر مشاورت ہوگی جبکہ نیشنل یونیورسٹی کے قیام اور پاکستان ری انشورنس کمپنی لیمیٹڈ کے سی ای او کی منظوری دی جائے گی۔
پاکستان اور ڈنمارک کے درمیان فریم ورک معاہدہ کی منظوری کابینہ ایجنڈا میں شامل ہے جبکہ سیلاب کی تباہ کاریوں کے بعد بحالی کےلئے عالمی معاونت کی سمری پیش ہوگی۔
اجلاس میں ترقیاتی سکیموں پر کام کے آغاز سےمتعلق بریفنگ دی جائے گی جبکہ ای سی سی اور لیجسلیٹو کیسز پر فیصلوں کی توثیق ایجنڈا میں یوم آزادی کے موقع پر سزاوں میں کمی کی سمری بھی پیش ہوگی
خیال رہے الیکشن کمیشن نے پی ٹی آئی کیخلاف فیصلے کے بعد معاملہ وفاقی حکومت کو بھجوایا تھا۔
