اسلام آباد : ملک بھر میں بارش کے بعد پیدا ہونے والی سیلابی صورتحال کے پیش نظر وزیراعظم شہباز شریف نے یواے ای کا دورہ منسوخ کردیا۔
اس حوالے سے ذرائع کا کہنا ہے کہ وزیراعظم شہباز شریف نے2 ستمبر کو متحدہ عرب امارات (یو اے ای) کے دورے پر جانا تھا، وزیراعظم نے ملک میں تباہ کن سیلاب کی وجہ سے دورہ منسوخ کیا۔
اس کے علاوہ وزیراعظم شہباز شریف نے کہا ہے کہ سیلاب متاثرین کو مایوس نہیں کریں گے، متاثرین کی بحالی کیلئے وفاقی حکومت اور این ڈی ایم اے مل کر کام کریں گے۔
دورہ سندھ کے موقع پر میڈیا سے گفتگو میں ان کا کہنا تھا کہ اس وقت فی خاندان 25ہزار روپے فراہم کررہے ہیں، ہر صوبے میں متاثرین کو بی آئی ایس پی کے ذریعے رقم دی جارہی ہے۔
وزیراعظم نے کہا کہ تین تاریخ تک انشااللہ25ہزار فی خاندان کو فراہمی لا عمل مکمل ہوجائے گا، سندھ کیلئے 15ارب اور بلوچستان کیلئے10ارب کا اعلان کیا گیا ہے۔
