اسلام آباد : وزیراعظم شہبازشریف نے بلوچستان ہائیکورٹ کے سابق چیف جسٹس محمد نور مسکانزئی کے قتل کی مذمت کرتے ہوئے قاتلوں کی فوری گرفتاری کی ہدایت کردی۔
تفصیلات کے مطابق وزیراعظم شہبازشریف نے سماجی رابطے کی ویب سائٹ ٹوئٹر پر بلوچستان ہائیکورٹ کے سابق چیف جسٹس کے قتل کی مذمت کرتے ہوئے کہا بلوچستان حکومت قاتلوں کی گرفتاری کیلئے تمام وسائل بروئے کار لائے۔
شہباز شریف نے مرحوم کے اہلخانہ سے تعزیت کا اظہار بھی کیا۔
I strongly condemn the assassination of Justice M. Noor Meskanzai, former Chief Justice of Balochistan High Court & Federal Shariat Court in Kharan. Balochistan govt should use all resources to arrest killers & bring them to justice. I send my condolences to the bereaved family.
— Shehbaz Sharif (@CMShehbaz) October 15, 2022
گذشتہ روز خاران میں فائرنگ سے سابق چیف جسٹس بلوچستان ہائیکورٹ نور مسکانزئی جاں بحق ہوگئے تھے۔
ڈی آئی جی خاران نے بتایا تھا کہ فائرنگ سے سابق چیف جسٹس محمد نور مسکانزئی شدید زخمی ہوئے، کوئٹہ منتقل کیا جارہا تھا کہ راستے میں دم توڑ گئے۔
مشیر داخلہ بلوچستان میر ضیااللہ لانگو نے واقعے کا نوٹس لیتے ہوئے ڈپٹی کمشنر سے واقعے کی رپورٹ طلب کرلی۔
مشیر داخلہ بلوچستان نے متعلقہ حکام کو ملزمان کی گرفتاری کیلئے اسپیشل ٹیم بنانے کا حکم دیا تھا۔