اسلام آباد: وزیر اعظم شہباز شریف کی زیر صدارت وفاقی کابینہ کے اجلاس میں توانائی بچت پلان پر بحث کی گئی، وزیر اعظم کا کہنا تھا کہ امپورٹ بل میں کمی کے لیے توانائی بچت پلان پر عملدر آمد اور متبادل توانائی کا استعمال ناگزیر ہے۔
تفصیلات کے مطابق وزیر اعظم شہباز شریف کی زیر صدارت وفاقی کابینہ کا اجلاس ہوا جس کا اعلامیہ جاری کردیا گیا۔
اجلاس میں وفاقی کابینہ نے دہشت گردی کے واقعات میں شہید افراد کے لیے فاتحہ خوانی کی، وفاقی کبینہ کی جانب سے کہا گیا کہ ملک میں امن و امان کی صورتحال پر کسی قسم کا سمجھوتہ نہیں کیا جائے گا۔
اجلاس میں کہا گیا کہ دہشت گردی کے عفریت کو جڑ سے ختم کر دیا جائے گا، دہشت گردی کے خلاف مسلسل جدوجہد پر سیکیورٹی فورسز کو خراج تحسین بھی پیش کیا گیا۔
اجلاس کے دوران وفاقی کابینہ نے پاور ڈویژن کی جانب سے پیش کردہ مجوزہ توانائی بچت پلان پر بحث کی، توانائی بچت پلان پر اسٹیک ہولڈرز سے اب تک کی گئی مشاورت پر بریفنگ بھی دی گئی۔
وزیر اعظم کا کہنا تھا کہ صوبائی حکومتوں سمیت اسٹیک ہولڈرز کے ساتھ مشاورت کے عمل کو جلد مکمل کیا جائے، مجوزہ توانائی بچت پلان کے نفاذ کو یقینی بنایا جائے، بحیثیت قوم توانائی کے حوالے سے کفایت شعاری کی اشد ضرورت ہے۔
انہوں نے کہا کہ امپورٹ بل میں کمی کے لیے توانائی بچت پلان پر عملدر آمد اور متبادل توانائی کا استعمال ناگزیر ہے۔
وزیر اعظم نے وزیر توانائی کو پاکستان میں ونڈ کی استعداد سے متعلق رپورٹ پیش کرنے اور سرکاری دفاتر میں بجلی کی کھپت 30 فیصد کم کرنے سے متعلق کمیٹی بنانے کی ہدایت کی۔
